حلم غريب ارجو تفسيره (الامام المهدي ع)

[البتوول]

السلام عليكم

اتمنى انكم تفسرون حلمي وهو من اسبوع تقريبا حلمته

حلمت اني ببيت جدي الله يرحمه ( وجدي رجل دين وخير وامام مسجد ) واحنا بغرفه جفنا السما وصارت ظاهره غريبه للقمر مب كسوف ولاخسوف لاا ظاهره اغرب بس قريبه من الكسوف والخسوف وعقبها سمعنا ان بيجون ناس وراح يعطونا شي ناكله راح يبين هل احنا موالين لاهل البيت وهل احنا على الطريق الصحيح

وبالحلم انا وامي وخالتي وبنات خالاتي وهم كان في ناس من مذهب مخالف وغير موالين لاهل البيت اعرفهم بس مب قادره اذكر من بالضبط وهم بالصج مب من مذهبنا

وكنا بالغرفه جالسين ببيت جدي ننطر الناس يجون الا نشوف الارض مثل سائل يمشي تحت رجولنا مو وايد حده خفيف ذي السائل مثل الماي بس مب ماي كان شفاف وحده نقي وجفت الناس الي بيعطونا الحبه ماكانوا بشر لاا كانوا نص الجسم التحتي ذيل سمكه ومن فوق جسم رجل وكانوا ضخمين طوال طول الباب يجون
وكنا بالغرفه وانا شوي خفت وانخشيت ورى امي وماسكه يدها

الي اذكره كانوا ثلاث ثنين راحوا للناس الثانيه الي بالغرفه و واحد جانا
قام طلع حبه مدوره هل هي فاكهه لاا مب فاكهه هل هي دوى لاا مب دوى ماعرف حبه غريبه
بس قبل لاا ناكلها جفنا الطرف الثاني من الغرفه الناس الي مب على مذهبنا اسودت وجوهم وشعرهم نكش وصاروا مقرفيييين حتى ملابسهم صارت باليه و وجهم متشقق شي فظيع صاروا وخذوهم وطلعوهم من الغرفه

وقام الرجال وعطى امي حبه امي كلت الحبه اقل من ثانيه يادوب بس تحركت كتوفها وحسيت مثل الهزه صارت بجسمها اغمج درجه بس ورجعت طبيعيييي وعقب خذ حبه وعطى خالتي وهم نفس الشي بس ثانيتين ورجعت طبيعي ولا كانها كلت الحبه

الرجال كان مستغرب وقال لامي انا مستغرب منكم واكثر شي انتي ذي الحبه حتى الموالين والي على الطريق الصح يطولون اكثر منج لين يرجعون طبيعي انتي ماخذتي وايد ماتغيرتي حتى
امي ردت عليه وقالت تبي تعرف ليش ادخل عقلي وجوف الانسان الي رباني تقصد جدي
واللتفت علي وعلى بنات خالتي جافنا قام يتفصحنا وقال لاا انتوا توكم صغار مابعطيكم الحبه وقال لنا انا عندي المقدره اجوف اذا انتوا موالين لاهل البيت او لاا وانتوا موالين بس الحبه للتاكيد
وقال لنا ذي الجمله " الامام المهدي قريب ويظهر" اللهم عجل فرجه واجعلنا من انصاره
قالها بكل هدوء ويقين وتبشير

وقام وطلع مثل الخيوط الرفيييعه من جسمه ودخله من انف امي عشان يوصل لمخها عشان يجوف جدي الي قالت عنه امي
وكنت اجوف هو شنو يجوف بس ماقدر اذكر او اوصف شنو شفت بس كل الي اذكره ارض مرتفعه ونازله وسما لكن لاا ارض ارضنا ولاا سما سمانا مادري مافي وصف
وبس وقمت من النوم

ارجو احد يفسر لي حلمي

[فجر الظهور]

انتظريني مع التفسير

[البتوول]

ان شاء الله خذي وقتج اختي

وهم عندي حلم بقوله لج بس عقب مايتفسر ذي الحلم اذا ممكن طبعا

[فجر الظهور]

وعليكم السلام ورحمة الله وبركاته
اللهم صلي على محمد وآل محمد


اختي العزيزة هذه رؤياك للقمر هو جدك فهو اما مسجد وتقي وتغير احوال القمر هو موته اما الذين جاءوكم بالحب الذي تاكلونه
هو هموم وانكاد لن تهزكم ابدا وذلك
لايمانكم وولائكم لاهل البيت فعندما دخل مصاب جدكم في حياتكم لم تهتزوا وذلك بفضل صبركم تيمنا بمصيبة الحسين (ع) والذين اشعثت رؤسهم هم من اهل النار.
وهذا السائل الذي يجري تحتكم هو جاه وعلم من الله وصبركم في مصيبتكم كافئكم الله بها بالعلم والجاه (وبشر الصابرين )هنيئا لكم
وبارك الله الام الصابرة والتقية الله يزيد من امثالهة .
الي شفتي خلال والدتك عو اعمالها وروحها النقية الي راح توصلك للجنة ان شاء الله وذلك كلهة بفضل حب الحسين فريح الحسين هي من الجنة روحي له الفداء عليه السلام والرحمة
بركتكم من اهل البيت هنيئا لكم

[البتوول]

مشكوره اختي
والله هو جدي صار له سنه وشوي من توفى وصج موته كان صدمه لنا بس صبرنا والحمدلله على كل حال


وهاي الحلم الثاني اختي اتمنى تفسرينه

الحلم الثاني
من ثلاث اسابيع تقريبا
حلمت اني بميناء وكان الوقت ظلام واناره بسيطه من نور الشارع والناس متجمعه مب وايد بس يمكن جي عشر اشخاص ماعرفهم الا نجوف قرش جاي صوبنا فانا خفت كان كبير كبييييير يعني تقريبا طوله 500 متر كان ضخم فانا شفت سلم فقمت اركبه وصعدت لين فوق وكان تحت البحر وهو يسبح وياكل الناس بس كنت اجوفه ان منتبه لي وجاي خصيصا لي لان حاول ينط لفوق عشان ياكلني بس ماقدر وحاول بعد مره وكان بيدي سكين قمت وطعنته بس لان كبير ماتاذى بس خاف ورجع وانا استغليت الوقت نزلت وقعدت اركض وانخشيت بداعوس وافكر اشلون اذبحه وشفت نفسي ماسكله مله واخلط شي الا جاتني امي وقالت لي اخلطي ذي وذي وحطيه مع السم واكليه عشان نفتك منه وماياذيج وانا سمعت كلامها وقعدت اخلط بس عقبها قمت من النوم


وعقبها بسبوع بعد
حلمت اني بمجلس وامي وخالتي وبناتها وفي حرمتين وحده زوجة عمي والثانيه امها واحنا مانحبهم لانهم راعين مشاكل وامي تدري ان هم يسببون اذيه قالت لي ولبنات خالتي قوموا ورحوا لفلانه ما قالت اسم بس قالت فلانه وانا فهمتها ان نروح للمره الي فوق التله ورحنا بيت فوق تله وفي حوليها خضار شوي دشوا بنات خالتيي عادي ماقالت شي بس من دخلت انا جافتني وحطت عينها بعيني ويدينها على كتوفي وعقب حضنتني وقالت ادري انج وااااايد تعبانه (وبالحلم اني تعبانه بسبب تعثري بالدراسه ) بس خل يروحون الناس بكلمج طبعا ماحد طلع واضرطيت اني اطلع من بيتها ورجعت بيتنا وانا بالبيت جفت خالتي جالسه وجلست معاها الا اجوف ذي المره جايه بيتنا دورني ومن جافتني مسكتني مع يدي وقالت لاتحاتين كل امورج بتصير زينه بس انتي اقري سورة الحمد وسورة الايات وماعليج خوف من اي شي ( وبالحلم ان الخوف من اي سحر )

تميت فتره ادور واسىل شنو هي سورة الايات بقد اقراها بس ماعرف

[فجر الظهور]

الاول :الحوت هم ونكد وان شاء الله خلصتي منه والسم ايضا هم ولو انك شربته لكان فيه تاويا اخر وافضل لكنه هم لانك لم تشربيه
ادغعي الصدقة وان شاء الله محروسين

[البتوول]

لاا السم مب لي اشربه اسم جالسه اسوي للقرش عشان اذبحه

[فجر الظهور]

الثاني :
هالمرة الي بالتل تعرفيهة؟؟؟

[البتوول]

المره الي بالتله لاا ماعرفها حتى شكلها كان غريب علي اول مره اجوفها

وعشان اكون اوضح
انا صار لي تقريبا 4 شهور اللبس حرز يحميني من السحر والعين واهل الارض لاني كنت وايد احلم احلام مزعجه واحس احد حولي او يمشي واسمع مشيته فسيد رجال دين سوى لي الحرز ومن عقبها وانا بخير لاا احلام مزعجه ولاا احس باي شي

بس قبل الحلم الثاني بسبوع نمت والحرز انا لابسته قمت لقيته مختفي ادوره بكل مكان ومتاكده قبل لاانام كنت لابسته بس مختفي ومن عقبها رجعت الاحلام ورجع احس ان في حد حولي ومن ذي الاحاسيس

[فجر الظهور]

رؤيا التل تدل علو ومال وقوة وايضا خيانة.
ان كنت تعرفين المراة فستخالطينها وان كانت بالحقيقة بينكم عداوة فسيكون هنالك صلح بينكم وبخصوص سورة الايات هي ليس فعليا اسمها الايات لكن هنالك سورة في القرآن الكريم فيها ايات تستعمل لهكذا امور وكل ايات وسور القرآن بركة انتظريني

[البتوول]

جزاج الله الف خير يا اختي

[فجر الظهور]

بالخدمة ان شاء الله

[البتوول]

اختي فجر الظهور

انتظر منك الايات بس ماخبرتيني ماهي الايات

" وبخصوص سورة الايات هي ليس فعليا اسمها الايات لكن هنالك سورة في القرآن الكريم فيها ايات تستعمل لهكذا امور وكل ايات وسور القرآن بركة انتظريني"