سهرة مع بليس

[حازم ال ذي قاري]

كبل يومين ليله واحد بشعبان
مثل كل يوم اكضي ليلتي سهران
ابحر للنجوم انطر نجم سعدي وتضجور بيبي عيني والسعد ما بان
وعلى طبعي الصحبني من زغر سني اكضي اليل بين مهافت الأوزان
وانه وي القوافي مناور عله الأه وعلى ضيم السفينه الفاجدة السفان
مرة ابجي على حالي ومرة اتغنة غنة العايش بغربة مو غنة البطران
وكبل ما ابدي واكتب اول بيت لن واحد لفاني يطوح بركبان
لفاني وكرب يمي لن شبح ميشوم كل خطوة اليذبها محايل وبهتان
منهو انته وشجابك بهذا اليل ؟؟ كال ابليس اني جيت الك سلوان
كتله وك امش من لعنت الله عليك ليفركاك عيد وشوفتك احزان
ابو مرة زعل وخزرني بغيظ مثل الذيب المعط لو خزر زعلان
كال اشمالك انته وياي يبنادم علي ترمي الشتايم والعلن الوان
تعال اكعد مخل نتحاسب انه وياك وخلي بينك وبيني يحكم الوجدان
انه الباري امرني اسجد الأدم وما نفذت امر الخالق الديان
كلت ياربي اني اسجد الوجهك لجن كلفه عليه ما اسجد الأنسان
خلقت ادم يربي بقدرتك من طين وانه الي خلقتني من سنه النيران
غضب رب الجلالة وكال روح ابعد وطردني منالعبوديه ورحت ندمان
هذي قصتي ويل باري يبنادم نوب ارجع القصتك يابو فلان
من قابيل ابديها الجتل هابيل شلون نسفك دمة ذوله موش خوان
هم انه اليوسف رميته بير لو اخوته وتالي تهمو السرحان
هم انه كطعت منحر نبي يحيى نبي وينذبح متجاوبني ذنبة شجان
هم انه الكلت ياناس عبدوني مثل فرعون وتحده قوة الرحمن
هم انه الردت اغدر نبي موسى يوم الي كلب ذيج العصة ثعبان
هم انه الدرت اصلب نبي عيسى على ذاك الصليب اكبال اهل نجران
هم انه الجبت وحشي على الحمزة وكلت جبدة مثل زوجة ابو سفيان
وحك رب التعبدة الناس يبنادم شفت منك مصيبه تشيب الرظعان
ابن بظعة نبيك طاح برض الطف وجسمة بلاجفن وجفن بتربان
وبني جنسه اعتنت من كل مهب وصوب على جتله صدد امواج من فرسان
عكب جتله انحمل فوك الرمح راسة وصدر حسين صار الخيلهم ميدان
يبنادم عكب ما وذرو جسمة على ايتام وحراير حركو الصيوان
هم انه الكلت اكطع نزاع الكوم يا حرملة وروح اظرب طفل عطشان
هم انه السبيت اطفال فوك النوك ويسيرة بت علي وتوكف وصط ديوان
شكثر من عكب احسين اهل بيته ........
{ اسمع بليس شيكول }
شكثر من عكب احسين اهل بيته شافو محن وهموم وقصص وشجان
اشكر ربي جي لن جعلني بليس وما سواني واحد من بني مروان
اشكر ربي جي لن خلقني بليس وما سواني واحد من بني مروان
ما اذكرلك شعملت بني العباس روح انشد عليها السجن والزنزان
جرايم لون اذكرها المقام يطول ومن همها يطيح عله الأرض سهلان
انه ادري شتريد تكول يبنادم تكول الماضي وله وانكضت ازمان
وحنه بالتطور والعلم صرنه وراح الجهل واهلة وكو بالطغيان
يا طغيان هذا الراح يبنادم راح الروسيه الي هدمة الشيشان
يا دوله الذي ما بيها ضيم وجور وياهو الي ياخذك عنها هو النسيان
بالهند المجاعة تريد تنساها لو حرك المساجد بأرض باكستان
لو تنسه مذابحها وبشيعة علي شعمله افغانستان
لو تنسه اللقيطة التسرح وتمرح ما بين الجنوب وهبة الجولان
اشتنسه البوسنه لو معركة قانة لو تنسه المئاسي الجرت يالسودان
لو تنسه العراق شحل عليه من ضيم وبسجن الطواغي ترزح الشبان
وفوكاها الحصار عليه من كل صوب وشعب العزة صار اسمة شعب جوعان
والتترجه منهم خير للتحرير للهدم بلدهم اصبحو اعوان
يبنادم قضيتك اصبحت سلعة وتجارة وضرب اموال وسفر بلدان
كل هذا وتكول بليس يا ملعون شعندي وياك يبنادم يعالي الشان
ادم نبي وما طخيت اله راسي وانته تركع وتسجد للمريكان
هاي امريكا هاي البيها تتبجع طلعت بالمذلة من ارض لبنان
واختمها واودعك بعد يبنادم جنك ما تريد السهرتك سلوان
لجن عندي وصيه وياك من تلعن العن نفسك ولاتلعن الشيطان
لجن عندي وصيه وياك من تلعن العن نفسك ولاتلعن الشيطان