المساعد الشخصي الرقمي

مشاهدة النسخة كاملة : مجموعة قصائد مني للعباس


مجنــونه بحـب العبــاس
07-15-2009, 09:02 PM
"]العباس بن علي بن أبي طالب (عليهما السلام)


عـــــبـــاس يــــا بـــــحر الزود عــــــباس هـــــاك اخـذ الجود

گـــــوم انــــظر حــــالة ايتامك تـــــنــــتظرك ظــــلت بـخيامك

عـــــباس يـــــا بــــحر الـــزود عـــــباس هــــاك اخـــذ الجود

* * *

يــــا عـــباس آنه اختـك زينب أشكـــــيـــلك واســـمع شكواي

اتــــعـــنــــيتك يا شــيمة اهلي جيت وجــــبت الـــعــيله وياي

أطـــــفال وخـــــدَّر عـــطـشانه كلها اتـــصـــيح الــماي الماي

يــــنـــــخاك گــــلبي المـجروح يــــنخــــاك لخـــــيامــــك روح

رضـــــعان اتـــشـــاهد جـدامك تــــنـــتظرك ظـــلت بخــــيامك

عـــــباس يــــا بــــحر الجـــود عـــــباس هـــــاك اخـــذ الجود

* * *

يـــــا عــــباس انــــظر حـالتنه عــــطــــشان ايــلوذ ابعطشان

نـــــفرض هـــاي الخدَّر تصبر لاچـــــن شــــيــصبر الرضعان

وانـــــظر عـــــبد الله بـيا حاله يــــتـــلاهب گــــلـــبه ابـنيران

اطــــــفال لا ويـــــن تــــــروح اطـــــفال تــــنـــحب وتـــــنوح

صـــــرخـــات اتهــــــيِّج آلامك تــــنــــتــظرك ظــــلت بخـيامك

عبــــــاس يــــا بحــــر الـــزود عـــــباس هــــــاك اخـذ الجود

* * *

عـــــباس اسمع صوت اطفالك چـــــم طــــفـله اتنوح وتنخاك

ما تــــدري اسكـــينه بيا حاله تنــــتـــــظرك بــــالخيمه هناك

وابصـــــوت الاحــــزان تنادي يـــــا عــــمـــي اتعـــنيت وياك

بحــــــماك يــا عــــمي جيــــت بحـــــماك يـــــا ســــور البيت

خابــــــن احـــــلامي واحـلامك تــــنــــتـــظرك ظلـــت بخيامك

عبــــــاس يــــــا بحـــــر الزود عــــــباس هـــــاك اخــذ الجود

* * *

يــــا عـــباس واصــعب موقف مـــــوقــــف مثـــــله ما شفناه

اطـــــفــالـــك واحــــد للــــثاني ايگــــله الشـــاطي ذاك ويـــاه

ســــاعه وعمنه يروح ابجوده وايــــجـــــيب الــماي ابــيمناه

للمــــــاي مشــــبــوحه عيـون لــلمــــــاي مـــــــنك يـــــردون

اطــــــفالـــك زهـــــرة ايامــــك تـــنـــتظرك ظـــــلت بخـــيامك

عـــــباس يــــا بـــحر الـــــزود عـــــباس هـــــاك اخـــذ الجود

* * *

عـــــباس اعــــيالك عطـــشانه وهــــذا الـحال اصعب كل حال

يــــا خــويه وشتشوف عيوني رضـــــعــــان وخــــدر واطفال

لــــو اگــــــدر اعــــصر دلالـي واســــگيــــــها ابـــماي الدلال

انـــــخاك مــــا تعــــرف ليــش انـــــخاك حاطتــــنــه الجيـش

گوم احمي اعيالي ابصمصامك تــــنـــتـــظرك ظـــلت بخيامك

عبـــــاس يـــــا بحـــــر الــزود عـــــباس هـــــاك اخـــذ الجود

* * *

شــــال الجــــود وشــال الرايه والســـــيـــف ايــــلوح ابيمناه

صــــنــديد وهاج اعله الحومه شيـــــصـــــبره وزيــنب تنخاه

سيــــطــر عـالشاطي وفرسانه وفـــــرَّت مــــن بين ايده عداه

نـــــادوه گــــــوم الـــعـــــدوان نــــــــادوه رد الــــصــــيـــوان

خــــل اخــــتك تنطيك اوسامك تــــنـــتـــظرك ظـــلت بخــيامك

عـــــباس يــــا بـــحــر الـــزود عـــــباس هــــاك اخـــذ الجود

* * *

ذل الحـــــومه وأدّه الــــواجب ضــــــحّه ابــروحه لأجل الدين

صـــــابوا سهـــمين ابو جدانه ســــهم الجــــود وسـهم العين

وبــــالعــــامود اتــصوب هامه وانگـــــطـــــعت مــنـه الچفين

نـــــــادوه سيــــــفه والجـــــود نــــادوه لخــــيـــامـــك عـــــود

عيـــــالــــك يالمتــصوب هامك تـنتــــــظرك ظــــلت بخـــيامك

عـــــباس يــــا بحــــر الــــزود عــــــباس هــــاك اخـــذ الجود

* * *
من ديوان الدموع الناطقة (الجزء الثالث) للاديب الشاعر/جابر الكاظمي
* * *

أنت الكفيل

أنــت الـحـديـت ابنـاگـتـي ولــلــــطــف جــبـتـنــــي

يـالـفـارگـتـنـــي عـــدمـــــن عــفــتـــنـــي

انــت الحـديــت ابـنـاگـتي ولــلـــطــــف جــبـــتــنـي

* * *

انت الجـبـتـني امـن المـدينه لكربـله اوياك

شــديـت بـيـدك مـحـمـلـي ويـرفـرف الواك

طـــول الـدرب يـابا الفضل ترعاني بحماك

تـنـدهـنـي عـونـچ بت علي لو ردت أنخاك

ويـن الـزمـان اللي مضه وذيــــــــچ الـــلـــيــالــــي

وانـفـگـد تـالـي خــــــدري ودلالـــــــــــي

ودعـــــت ويـــاك الخــدر يــــــالـــودعـــتـــــنـــــي

* * *

عبــــاس عنــــدك عـايـلـه تـنـتظرك اتعود

لــن الخــبــر لـيـهـا وصــل واليـها مفگود

لــو أدري مــن تـطـلع بعد ما ترجع اردود

مــا چــان خـويــه سـلـمـت بـيـمينك الجود

راح الخــدر يـابـا الفضل ومــنــــيـــن اجـــيـبـــــــه

وآنـــه غـريـبـه بـــــوادي المـصـيـــبــــه

چـــم فـاجعـه وچـم نايبـه اخـــلافـــــك دهـــتــنــــي

* * *

يــوم المصونه ابمحملي وتحرسني ولياي

ويـوم اشـگـف اسياط الشمر خلتني دنياي

لاذيـــچ هـيـبـة عـزتـي ولا ذلـتـــي هـــاي

لــو أدري چفــــك يـنگـطع ما أطلب الماي

يـا خــويـه وسـفه فارگك عــــــنـــــي زمــــانــــــي

عـگـبـك ولانـي وســـهــــمـــه رمـــانـــي

صـرت اكـفـل أيتام وحرم يــــالـــلــــــي اكــفـلـتـني

* * *

للمشــرعـه جيــت وشــفـت يمـك الچـفـين

بالـعـــمـد صــابـوا هـامتـك والسهم بالعين

نـاديـتـك بصـوتـي وصحت وين اتجه وين

مـا تـدري يـا خويه انذبح من بعدك حسين

وآنـــه البـگــيـت امحيره ولا والــــــــي عـــنــــدي

عفتوني وحدي مـــــن يــحـــمــي حـــدي

ابيا حاله من بعدك صرت يــــا مــــن عــفـــتـــنــي

* * *

شـفتـك صريع اعله النهر وبصوتي ناديت

يـا ريـت شـاطي العلگمي ما يجري ياريت

بـيـن امـشـي يـو يـمـك أظل محتاره ظليت

حـنـيت الـك حــــن الإبـــل ولـدمـعي هليت

وامـنــيــن اجـتني النايبه وهاي الفجيعه

يــــم الشــريـعه چفوفك گطيعه

چـم نبله من گوس الدهر بالطف رمتني

بالـگـلب نـاريــن اسـعـرت مـن جور الأيام

نــاريــن نـار امن الضمه ونار امن الخيام

يا نار عگــبـك تـنـطـفـي ويــا جــرح يلتام

محـتـــاره أجـمـع هـالحرم لو أحرس أيتام

يـا ريــت گـبـلـك يــا گـمر گـطــعــــــوا يـــمــيـنـــي

وسهمك ابعيني إســـــــمــــع ونـــيـــنـــي

گــــوم آل اميـــه بـكربـله عـــگــــبــــك ولـــتـــنـي

* * *
من ديوان الدموع الناطقة (الجزء السابع) للاديب الشاعر/ جابر الكاظمي
***
---------------------

يا أبا الفضل

تــصـــرخ اطــــفـال وخـدّر لـيــــش الكـفــيـل اتـــــأخَّر

واتـحـيَّـــرت يـابـا الفضــل كـــل سـاعـه ينشـدني طفل

لـيــــش الكـفــيـل اتـــــأخَّر

* * *

آنـه اخـتــك لصـوب الـنـهـر صـرخة حزن أرفعها صـرخــه وأظـن تســــمعها

عبـــــاس عنــــدك عـايـلـــه جـور الـدهر ضــيعها وجمـــر العطــش لـوَّعـهـا

عـطـشــانـه تـشــرب بـالـدمــع والدمع مــا ينفعها مـهـمـــا كـثـــر مـدمـعـهـــا

ريـتـــــك يـخــويـه تـحـضر بـعــيـنــك تـشـوف المـنظر

أطــفــال ظــلـــت حــايمـــه تنشــــدنـي مـن حـر الظمه

لـيــــش الكـفــيـل اتـــــأخَّر

* * *

اشــــرحــلـك اخـبــار الـعـطــش واشـخلفت نيرانه بـالـعـايـلـه الـعــطــشــانـــه

بـالـخــيـمـه شـفـت اول طفـل يابس يخويه السانه واتــــغـــيـــرت ألــــوانــــه

وثـانــي طـفـل عـنــك نشــد ليـش الگمـر ينســانه ونـشـــرب دمـــع خــلانـــه

وثـــالــث طــفــل يـتـحـسـر واعـلــــه الــدرب يـتــنـظّر

يـنـشـدنـي يـا عمه اشعجب طـــال الوعد شنهو السبب

لـيــــش الكـفــيـل اتـــــأخَّر

* * *

يـابـا الـفـضـــل رابــع طـفـل حيـرني بالطف امره ريـتـــك يـخـويــه اتـنـظــره

هـالطفـل صار امن العطش عالگاع يفرش صدره كـــل ظــنـه تـطـفـه الجمـره

ويگـوم مســرع مـن يـحـس بـهـذا التـراب وحَرَّه ويـعـتــب بـصــوت الـعـبـره

ظــامــي ولـســانـه اتـفـطّر وحــتـــى الـحـچي ما يظهر

ايحـاچـيـنـي بـلـسان الدمع مــا يـــدري بـيـنـه بياوضع

لـيــــش الكـفــيـل اتـــــأخَّر

* * *

وخـامس طفل يابا الفضل ما عنده صوت ايرفعــه ولا يـحـچــي حـتى انسمعه

مــحــنــيــه أمـه اعـله المهد للطفل تنظر وضــعه تـــريـد لـطـفـلـهـا اتـرضعه

يـابـس ثـديـهــا ونـادتـه هـاك ارضـع امـن الدمعه عـمــــك بـعـــد شـيـرجـعــه

چـبـــد الـطـفـل ظـل يســعر وبـيـــا صـــبـــر يـــتـصـَّبـر

حـتــى الـرضـيـع البالمــهد عنــــــك يـبــو فـاضـل نشد

لـيــــش الكـفــيـل اتـــــأخَّر

* * *

والنــوب طفــلـه امـدوهـنـه ومـحـتاره وگفت يمي زيــــدت حــزنــي وهــمـي

اتـنـاشــدنـي عنـك يـا گمـر يـا سـاعه يرجع عمي والـعــطــش ذوب جـسـمـي

عطـشـانـه خــلانـي ومشـه يـا لوعتني ويا هظمي شـيـــداوي گـلـبـي المـدمي

گـــلــبــي انــجـرح واتوجَّر واعــلـــه الصـبـر مـا أگدر

خــلاني عـمــي ابــهــالأمل ما أدري شنهو اللي حصل

لـيــــش الكـفــيـل اتـــــأخَّر

* * *

عـبـــــاس وآنــه مـن الصـبـر عگـبـك تـغير حالي كـــل ســاعــه حسبه ابّالي

ســــاعــه يصــــورلــي الأمـــل بـالمــاي تتعنــالي وترتــوي گلــوب اطـفــالي

وســـاعـه يصـور لـي القدر جسمك صريع اگبالي واصـــرخ فـگـدنــه الـوالي

تـــاه الـفــكـــر واتـحـــــيـر يا حـــالــه بـالـطــف تظهر

ضــجــت اعـيــالك بالخيــم تنشــــدني اطفـــال وحــرم

لـيــــش الكـفــيـل اتـــــأخَّر

* * *

يـابـــا الـفـضــل گـلـبــي علــــم لمـخيمك ما ترجع چـنـــك طـحـــت بالمصـرع

وحـيـن اعـتـنـيـتـك للنــهر شـفتـك يخـويه امگطع وگلـبــي عـلـيــك اتصـــدع

طــحت اعله جسمك وامزجت دمك وفيض المدمع يــابــا الفـضـل هـاك اسمع

جـيـتـــك يضـنــوة حـيـــدر شــفـتـــك صــريــع امــوذر

مــن جيـت للشاطي وشفت نـــاديت هــسّــاع اعـرفــت

لـيــــش الكـفــيـل اتـــــأخَّر

* * *
من ديوان الدموع الناطقة (الجزء السابع) للاديب الشاعر/ جابر الكاظمي
* * *
--------------------------

يا عباس أنت المسؤول


وعدك وينه وعدك وينه صاحت زينب، وعدك وينه

يا عباس انته المسؤول عن هذا الموقف شتگول

وعدك وينه وعدك وينه صاحت زينب، وعدك وينه

* * *

يا عباس أنـــــت الكافــــلنه وانـــــت الضيغم والصنديد

جيت اشرحــــلك حال عيالك عـــــــطشانه وللماي تريد

اطفالك ما تگـــــــدر تصرخ صــــــــارت توميـلك بالايد

وهذا الشاطي اگـبال خيامك لا لتگول الشاطي ابعـــــيد

لتخليــــــــــنه، لتخليــــــــنه بهذا المقـوف لتخليــــــــنه

تتراجف مـنك هالجــــــــيش صابر عـن هالموقف ليش

وعدك ويــــنه، وعدك وينه صاحت زينب، وعدك وينه

* * *

كلسا طفــــــــله اتمر اگبالي توگف يـمي وتحچي اوياي

ما أفهم مــــنها اشما تحچي ولا أسمع بــس چلمة ماي

منهو ايصــــبر هاي الطفله حاچيني وباصــــرني براي

تگعد لو تطــــــــلع للشاطي ابكيفك ظلت يـــــــمك هاي

يا والينه، يــــــــا واليــــــنه بيدك جودك يــــــــا والينه

أنت العارف والحســــــــاس ظلت يـــمك يا عــــــــباس

وعدك ويــــنه، وعدك وينه صاحت زينب، وعدك وينه

* * *

ما أشرحلك حال الخــــــــدّر اشـــــرح بس حال الأطفال

طفلين من اطفالك وگفـــــوا يحــــــــچون ابمدمع همال

واحد ينشد مــن الثانــــــــي شـــــتگول أنت بهذا الحال

يطلع عمنه المــــاي ايجيبه لو نبــــــــگه ابجمر الدلال

يعلم بينه، يعــــــــلم بيـــــنه شاف الحـــــاله ويعلم بينه

خل نطلع يم عمنه نـــــروح ونگله ابمــــــدمع مسفوح

وعدك ويــــنه، وعدك وينه صاحت زينب، وعدك وينه

* * *

خل اترك حالــة اطفالـــــــك واشرحـــلك حال الرضعان

كلسا اسمع واحد يصـــــرخ وأمه تحاچـــــــــيه بأحزان

هاك ارضع من دمعة عـيني وحتى المدمــع هم خلصان

ظلت يم عــمك يولــــــــيدي بس هوّه اليروي العطشان

شبحت عـينه، شبحت عينه حتى اليرضع شبـحت عينه

ما عنده لســـــــان ايحاچيك بلسان الدمعه ايــــــــناديك

وعدك ويــــنه، وعدك وينه صاحت زينب، وعدك وينه

* * *

يا عباس وإلمــــــــن تصـبر من صبرك شنـهو المريود

بيدك هذا الجود الخــــــــالي ابلا ماي اشينـــفع هالجود

هذا الشاطي اگبالك يجـــري والمثلك ميريــــــــد اشهود

ريتك سالم ترجــع الــــــــنه ولخيامك بالـــــــماي اتعود

واترويــــنه، واترويــــــــنه ترجع سالم واتـــــــــروينه

راح انظــــــــل ابهــا الآمال واتذكر كل صوت الگـــــال

وعدك ويــــنه، وعدك وينه صاحت زينب، وعدك وينه

* * *

شال السيف وهاج وأغضب والرايه اترف اعله الرأس

صارت ضجّه ابباب اخـيامه وحده اتحذره من الأرجاس

وحده اتحب اچفوفه اتگـــله لا تتأخر يــــــــا عـــــباس

وحده تصيح ارجع يا عـمي لا توليك أشرار النـــــــاس

لوظلـــــــينه، لو ظلــــــــينه بهاي الحاله لو ظلـــــــينه

بس دمعــــــات العين تسيح كلسا يسمع طفله تصــــيح

وعدك ويــــنه، وعدك وينه صاحت زينب، وعدك وينه

* * *

بزودك مــن توصل للشاطي يا عباس اذكرنه اهــــــناك

بس ما تـترس جودك ارجع لخيامك والماي آويــــــــاك

اطفال وخــــــــدر تنتــــظرك ما تگدر تحمل فرگـــــــاك

اسرع للأطفال ابجــــــــودك واسگيها الماي ابيـــــمناك

رد اعــلينه، رد اعــــــــلينه جيب الماي ورد اعـــــلينه

يا عـــــــباس وشنهو الماي ما نطلب أكثر من هــــــاي

وعدك ويــــنه، وعدك وينه صاحت زينب، وعدك وينه

* * *
----------------------

موال في مصاب العباس (عليه السلام)

من حين طاح العلم محد حمــــــــــــل ذابله

وصمصامك أعله الأرض چفك وسف ذابله

مصابك لون بالصخر چان الصخـــــر ذابله

نصين يا با الفضل گلبي انجسم وأنـــــــطر

من هظم جدواك مذهول العگل وأنــــــــطر

ظليت اتانيك عيني أعله الدرب وأنــــــــطر

وبكتري أطفال من حر العــطش ذابــــــــله

* * *
من ديوان الدموع الناطقة (الجزء الثالث) للاديب الشاعر/ جابر الكاظمي
* * *
-------------------

شجاعة العباس (عليه السلام)

حي عباس رمحه الجثث زرگـــــــــــــها بيض وسمر سم الرمح زرگــــــها

* * *

يلذع بالرمح مرهب يذب اســــــــــــموم وبسيفه يصب الگدر والمحـــــــتوم

هز الرمح من أرمگ جبيله الگـــــــــوم من هزته اعجود املوحه طگــــــها

* * *

طگ اعجود رمحه وهاج بيه الـــــباس عباس ونعم من گال حي عــــــباس

ماس وچسب چاس من الوغه ونوماس غانم والمغانم عــــزمه طوگــــــــها

* * *

فاعي ولو نفر منه امحرب ميــــــــفوت واللي فات لتظن ما يلوحه المـــوت

ملچ الموت رافگ مرهف المنعــــــــوت وأرواح الزلم برهــيفه عــــــــلگها

* * *

عكوبس وبرهيـــفه اتعــــــــلگت أرواح گدر روح كل مجبل وروح الــــراح

صياح ويخرس حــــــــومته لــــو صاح حگها لو تظل املجلــجه حگــــــــها

* * *

من صاح أبو جهه لسانــها اتلجــــــــلج صول على الجيمه وغــــدت تتموج

صاح الله أكـبر والحــــــــرب يرتــــــــج صيحه ابصيحة الكرار واشـــــــگها

* * *

أعله بـــــــــــن ود كبًّر الكرار بالخندگ لا چن شوف حامي امخدرات الحگ

بسبعين ألف عــــــــمر بكربـله امطوگ وايذچِّر أعداء ابـــــيوم خنــــــــدگها

* * *

حي عباس لاح بصهـــــــوة الأدهــــــــم غضب وأعــله الملاحم أرعد ودمدم

خله الغاضريه تموج مــــــــن الــــــــدم خنياب وطفح والمـــوج غــــــــرّگها

* * *

هذا اليوم جيثوم الحــــــــرب يومــــــــه طوّجها وفنه وشــلع الملــــــــزومه

خلاها شــتت واختــــــــلّت الحومــــــــه شراذيب انفرت والمــــوت لا حگها

* * *

عالصوّال صــــــــال وعــــاف كل شارد حيث الموت لنّه حصــــــــة المــارد

زم بيده المــزاده وللنهــــــــر رايــــــــد وحافر مهره للجيمان يسحگــــــــها

* * *

عگب ما ملك مـــاي المشرعه الصنديد مله الراوية وسدّر للخـيام يريــــــــد

لن تتنطره الگوم ابهــــــــنادي ومـــــيد وأبحد الشريعة اتحــوم سبّگــــــــها

* * *

كل همه يــــرد بالمــــــــاي لخــــــــيامه واشباح المنايه اتلــــــــوح جــدّامه

چالهزبر رعــــــــد وابچــــفه صمصامه وصيحاته رعيد الموت رافگـــــــها

بالذابل غزاها وذبل عــــــود الحــــــــيل فناها وذل عجيدتها ونشبها الـــويل

ليل أصبح ضحاها من عـــــــجاج الخيل وبليل الچتام انحـــجب درنگــــــــها

* * *

انحدر شبه العگاب اللي يشــــگ الريح طوح بالنفوس أعـله الحتف تطويح

غضب وايرجّف المسكون مـــن ايصيح ورگاب الاعــــادي دمــــــــوم دفّكها

* * *
من ديوان الدموع الناطقة (الجزء الثالث) للاديب الشاعر/ جابر الكاظمي
* * *
-------------------

يا ابا الفضل

نصبـــت العـــــيلتك صــــــيوانــــــهـا مثـــــل مـــا خانك زمـــــانك خــــانها

* * *

گــــوم يــا عباس من مصرعك گوم هالحـــرم يـــمك على الشاطي تحوم

تشوف جثتك صدگ غسلتها الدموم ونسج الها الــــترب ثــــــوب اكفانها

* * *

وبـــعد رادت يـــا گمر هاشم تشوف صدگ من زنـودك مگطعه الچفوف

اتگلك اگعد شوف غارات الصفوف واجت تــــشكيلك ظــــلم عـــــــدوانها

* * *

وبعد صاحــت صـوت يـا منبع الزود لون ما يــــنصاب راســـــك بالعمود

مـــا تجي الخــــياله وتـدوس الحدود ولا تشب خـــــيامك بــــــنـــــــــيرانها

* * *

وعســـــكر ابـــــن زياد عالثايه هجم وبــــــيده جــــــتالك شـــعل نار الخيم

لون ما تــــنصاب عيــــــــنك بالسهم ما تــــــفر عــــــيالك بـــــوديــــــــانها

* * *

فــــوگ جســــمك هون ربات الخدر انهــــــض لنخــــــوتهن ولا تـــــعتذر

چــــم شــــمر جاير عليها وچم زجر والشــــــماته مــــــا خطــت نيــشانها

* * *

صــــاحن ابـمصرعك انهض يعباس انچان عــذرك بالعمد صوّب الراس

ظلع اخـــوك حســـين بالحافر انداس ونهـــــض لاخته من سمع اشجانها

* * *

واحـــنه يــــــا عباس اجينه انحشمك وردنــــه باصــــــوات الحنان انكلمك

انــــگلك الــــخيل اوصـــلت لمـخيمك ومن يرد عــــن الخيــــم فـــــرسانها

* * *

تضـــن عگـــــبك هاشمي ما منچتل لا ولا واحــــــد ســــــلم حــتى الطفل

بالسهم نحـــــره انگطع يا ابا الفضل والارواح انــــسلبت مــــن ابــــــدانها

* * *

ما بگه نـــــغّار يحــــرس عيلـــــــتك وســــورها اتــــهدّم ابـــطيحت رايتك

عــــالوطيه اتــــوسدت كـــــل اخوتك والنبــــوه انـــــفجعت ابشــــــبانــــــها

* * *

عيــــلتك صابــــــره وداست عالجمر وابـــد مــــا يـــــنقبل منـــــك كل عذر

گـــوم باصــــرنه لــــون صار اليسـر مـــن يــــــرد عيـــــالك لاوطــــــانها

* * *
من ديوان الدموع الناطقة (الجزء الثاني) للاديب الشاعر/ جابر الكاظمي[/SIZE]
* * *

كعبة الأحزان
07-16-2009, 01:25 PM
اللهم صل على محمد وآل محمد وعجل فرجهم الشريف

.. :": .. مجنونه بحب العباس .. :": ..

شكرا ً لك على هذه المشاركة المعطرة بالأنوار المحمدية
عطاك الله العافيةً وسلم تلنا هـــــذه الأنامل الولائية

نسألكم الدعاء

مجنــونه بحـب العبــاس
07-16-2009, 01:37 PM
شكرا لمرورك على موضوعي وهذا شرف لي ووسام على صدري