( ..زوجــــي ( او ) دراســــتـــي ..!!) بقلمـ,, همسوهـ
 

اللهم صلي على محمد وعلى آل محمد

الدراسة بكل تأكيد خاصة ان الزوج كذب في البداية اكييييييييييد لا يثق فيه على المرأة تحاول ان تغير رايه بالين وادخال بعض الاهل للمشورة لعله يرجع في رأيه لكن مثل ما قلت لك انه لا يثق فيه فيمكن يوم من الايام يبتعد عنها وتحتاج لشهادتها الي تركتها لأجله.
وشكراً على الطرح الحلو

اذا الفتاه اشترطت ذلك من البدايه وانكتب الشرط في العقد ووافق الزوج على ذلك مايحق له في الاخير يخل بهذالاالشرط(الي اوله شرط اخره نور)

اني مع يتيمة الزهراء دام انها اشترطة من البداية وانكتب في العقد ماله انه يخل بالشرط اصلا حتى الفتاه بعدين ما تثق فية ويطيح من عينها

لكل مقام مقال المهم اشوف الذي في مصلحة زواجك سويه ورزق على الله مو على الشهاده اذا كانت على ثقه بزوجك

المشكلة لو رفض بسبب أفكار سخيفة وغبية وهو انه لازم الزوجه ما تدرس عشان لا تكون أحسن منه في هذه الحاله هو ينظر بإحتقار للجنس الأنثوي كله
وبالنسبة للزواج يشبع الحاجة للأمومة وللحاجة كزوجة وهو فرصة ممكن تكرارها
أما الدراسة هو الحاجة لإثبات الذات وتقديرها وهو فرصة لو انتها وقتها ما اظن تتكرر
وغير كذا الثقة بين الزوجين لو اختلت .. اختلت جميع موازين الحياة الزوجية
والمشكلة الحقيقة انها لو فرطت في زواجها و ما نجحت دراسيا لأي سبب .... حتكون مشكلة وتجرب قاسية جدا
فعلا القرار صعب جدا جدا
لك كل التحية والشكر
أختك
فاطمة

طبعا المستقبل مو الزوج

مثل ماقالو البنات .. هذا شرط وعلية التنفيذ

وذاا خيروني .. مستقبلي اهم

اما هو بعتبرة انسان متخلف و غير وفي بعهوده

ومافية خير بمعني اصح لانة -ماوقف معاي ابني مستقبلي

اما بنسبة لشغل .. يمكن 20 % اتنازل عن العمل بس 80 % ماراح اقعد في البيت علشان معتقداتة او حتى تفكيرة. يعني معقولة ادرس واحصل شهاده افتخر اني حصلتهاا واشتغل في المجال اللي سهرت اليالي علشان احققة
علشان وااحد كذاب ..

لا مااعتقد .. وعلى العموم الظروف تحكم اشياء واايد

الزواج قسمة ونصيب


تحياتي

يسلمووو خواتي على
مشاركاتكم ورآيكم
عجيب ونود جميع الاعضاء
مشاركتنا في الموضوع

اني في نظري ان تقبلي الزواج حتى لو بدون دراسة
الدراسة ما تهم اي شغل بتشتغلين يعني مديرة
لكن الزوج اولى من الدراسة اهتمي بزوجك وعيالك احسن لك من الدراسة

اسمحي لي اختي ام البنات هذا كلام اهل لول وكلام الناس المتخلفين

أنا أشوف أمر الدراسة شيء يخص الزوجة و بالعكس الزوج الذكي المفروض يفرح

لمن زوجته تبي تكمل دراستها بحيث تكون متعلمة و مثقفة مو جاهلة



تحيآتي

غريب جداً ان يكون هذا هو ردك اختي ام البنات خاصة ان يستسلم الانسان لشخص لا يستحق
نحن كــ مسلمين نحترم الرجل ونقدس الزواج والأسرة لكن هذا لا يعني ان يكون زوجنا محتال مخادع يقبل بالشروط وبعدها يخل بها على المسلم وعلى الرجل الحقيقي ان يلتزم بكلمته هكذا تربينا وعليه ان يقبل او يرفض من البداية لا أن يبحث عن اساليب للوصول لمبتغاه ..

شنو قصدش يعني اني متخلفة؟؟؟

يتيمة الزهراء

لان الشهادة ما منها فايدة ابد
شنو بتشتغل يعني او في اي قسم بشغلونها
يا ما ناس عندهم دكتوراء قاعدين في البيت
حبيبتي البحرين الى الاجانب مو الى البحرنيين وبالاخص البحرانيين

بصراحه الاثنين مهمين
بس اذا كانت البنت متفوقه دراسيا
الدراسه اهم

ام البنات ..

اخالفج في المووضوع

هذلين ارزاق من رب العالمين

صدق الحكومة مو مقصرة ذاله شعبهاا ومستنهم اغراب

بس كل شي ارزاق ..

واسمي كلامج مع احترامي لج .. قلة ايمان ..

كيف تخاف الفقر والله رازقا ..الخ

الشهاده سلاح واللي يقول غير جذي .. انسان ماعرف الدنيا بكرة تحك ويعرف معنى الشهاده


تحياتي

وصلت للموضوع متأخره ولكني من وجهه نظري ومن تجربه لاحد البنات اني شايفتها بعيني
لما تكون البنت متزوجه وخصوصا في عمر صغير خلنا نقول تقريبا في نهايه الثانويه او بدايه الجامعه
خصوصا لما يكون الرجال هو بعد صغير ونقدر نقول شبه مو قد مسؤاليه
فبترجع مسؤاليه البنت كلها على ابوها بالمقابل ما فيه فايده زواجها ولا دراستها لأنها راح تقصر من الطرفين
وتصير المشكله اكثر لما هالبنت تخلف وتجيب لها ( ولد ،، بنت ) فالبنت من وجهه نظري الشخصيه
راح تكون ضايعه بين واجباتها اتجاه بنتها وواجبتها وحقوق زوجها اتجاها ومستلزمات وحوسه الدراسه
فمنو وجهه نظركم انتو وين تكون الافضل في الدراسه او في بيتها مع زوجها واولادها
في النهايه هي ماراح تطلع بنتيجه غير جلوسها في البيت فـ ( تيتي تيتي مثل مارحتي جيتي )
هذي وجهه نظري لما توصل الامور لهذي الدرجه فمدارتها لبنتها او ولدها افضل بمليون مره من الدراسه فالبنهايه ان صار ماصار ما احمل حد مسؤاليه الام نفسها المفروض تتحملها فالجلوس في البيت افضل خصوصا اذا مو الام هي اللي تربي اولادها ة__ة
يسلمووو عالطرح المميز
الله يعطيك الف عافيه
تحيااااااتي

يسلموو أخواتي الكرام
على وجهات نظركم المميزة
ونبي تفاعل ازيدمن باقي الاعضاء
بإنتظاركم ؟!

لا عفوا مااقصد انش متخلفه
بس كلامش مو معقول وشو يعني الوحده تقضي عمرها علشان الزوج وطلاباته مو حياه هذي زوج واولاد وخلاص
وبعدين؟؟؟
مو ضروري الشهاده علشان الوظيفه
الشهاده سلاح مع مرور الزمن
الشهاده اثبات للذات حتى لو مافيه وظيفه
يكفيش انها بتكون (جامعيه) ومتعلمه
على الاقل يوم القيامه لما ننسئل عن شبابنا في ايش افنيناه؟
يكون عندنا جواب يبيض الوجه
افنيناه في طلب العلم

صح يتيمة الزهراء

مو شرط البنت تشتغل .. بس الشهاده سلاح مع الزمن ..
الظرف تجبر الوااحد وخصوصا بوضعنا في البحرين تخلي بنت تشتغل حتى لو كان عندها جهال
بكرة تحتاج تشتغل .. شنو راح تشتغل .. شنو الشهاده اللي عندهاا .. شنو موهلش الدراسي

بتشتغلين براتب ضعيف من الصبح لليل .. قعدي في البيت احسن

وتركي كل هذا وراء ظهرش لا شغل ولا ظروف

اولادش يكبرون يحتاجون حق الثقافة اللي عندش .. او بيقتصر على اعداي او ثانوي مو كامل بعد

بيحتاجون حق تدريس .. والعلم يطور يوم عن يوم والمناهج صاير واايد صعبة

وش بتسوين بتخلينهم يعتمدون علي الدراسة .. ظروفش ماراح تخليش تودينهم معاهد .
حتى بكرة جامعة . صح
انتي اهني بجي دورش لانش متعلمة ..

وانتي بكرة راح ترضين تاخذ بنتش الاعدادية وانتي سهرانة عليهاا ودافع دم قلبج علشان تجوفينها متخرجة
علشان زواج وزوج يمكن حتى مايقدرهاا ..
او تفرحين لماتجيب لج شهاده الجامعة ..
فية فرق طبعاا.. وطلب العلم حتى لو في الصين ..
لوكان العلم مو مهم .. جان اهل البيت مااوصو بالعلم والثقافة ..الخ

تحياتي

يسلمووو قطرات الندى
على مرورك الكريم
ووجهت نظركِ السديده

السلام عليكم والرحمة
الأخوات ما قصروا بكن حبيت أعقب على هالجملة

وبالنسبة للناس اللي تتكلم عنهم الأخت ، أتخذوا من الحكومة سبب في فشلهم ، إن أحد كلمهم عن الوظيفة قال وين أحصل وظيفة في هالبلد ؟ شعب متشائم ..

لكل مجتهد نصيب الأشغال ما راح تنزل لهم من السما وبما أن الكل يدرك بأن البحرين بلد الأجانب وخيرها لغيرها ، ليش ما يتعبون على عمرهم ويدورون وظائف ، قاعدين في بيوتهم ويتحلطمون ولا مرتزين في الشوارع وقالوا الحكومة سوّت والحكومة قالت..

مشكوورة ع الموضوع