منتديات أبو الفضل العباس عليه السلام - ألانترنت - الخادم الحسين الشاعر احسان القريشي

ألانترنت

أسألك ليش أيمانك ضعيف اليوم
والشيطان داخل فكرك معشعش
يصيح الله أكبر وانته يبن الناس
ع الانتر نيت ويه اصحابك تحشش
ولك أنته چبير وفاهم ومفروض
على درب العباده عيونك تفتش
درب ربك نجاة وراحه واستقرار
عوف الفيس بوك وبالدرب كمش
مسلم أنته اسألك لو يهودي الدين
جاوب لا تضل محتار وتهمش
شنو تنشر صور بيهه الستر مفگود
وشنو تنشر مقاطع للحيه تخدش
هتفونك بأذنك والغناء يصيح
ولك هاي الأغاني بدينك تفلش
يسالوك اعله مطرب تحچي بالتفصيل
يسالوك اعله دينك تطلع مكدش
انته هواي جاي تأذي ابو السجاد
وعلى جروحه ملح بفعالك ترشرش
مسلم أنته كون اسلامك يخليك
تركض للصلا مرتاح ومنشنش
چا أنته شجاك اويه الربع خدران
وتحچي اويه البنات وبالك موشوش
ميفيدك تسولف وي بنات الناس
اليفيدك للصلا سجادتك تفرش
باچر من تموت وللگبر تنشال
صدگ بس صلاتك تنفعك كلش
صار الفيس ربك أللعن الشيطان
وانهض للصلا عالفيس لا تلطش
عوف المنتدى والفيس والأصحاب
گلهم خل نصلي ونرجع ندردش

الخادم الحسين
الشاعر
احسان القريشي