منتديات أبو الفضل العباس عليه السلام - لسان حال الزهراء عليها السلام

اخبرك يانبي الرحمه * هذوله الگوم ظلموني
يبويه تحزمو ضدي * على وجهي يسطروني
وره هالباب * جره الامصاب
********
يبويه بگومك انته ادره * بحسدهم والحقد عادوك
بحياتك عذبو حالك * چم آه والـــــــــــــــــــم راووك
گبل متودع وترحل * گومك بالهـــــــــــــــــجر تهموك
شفت دمعاتك يهلن * دريت بهالحچي أذوك
وصيتك ناوي تكتبهه * حالو بينك ومنعوك
اذا ظلموني معناهه * بظلمهم هذا هم ظلموك
مدري يامصاب احچي * يبويه وكثرن همومي
عذاب ولوعه وبونه * بيهن ينتهي يومي
ظلم وارهاب * جره الامصاب
**********
على فراش الاجل شفتك * چن كل الشرع مطروح
شرد كل الفرح مني * تركلي بس هضم والنوح
يبويه ولو رحت عني * تروح اوياك هاي الروح
تظل حسراتي تترادف * يظل هذا الگلب مجروح
تراهن مو جرح واحد * جروح وكلهه تدي جروح
يريت وياك تآخني * اتمنـــــــــــــــــــه سويه انروح
مايسوه العمر دونك * بعدك ينهــــــــــــــدم حيلي
مثل شمعه وطفت روحي * انهاري مظلم وليلي
صرخ الاكتاب * جره الامصاب
********
سمعتك تحچي وتسولف * توصي بحيدر الكرار
تگله ياعلي تصبر * لون هجمت عليك اشرار
واذا بنتي يظلموهه * وتوج بابك لهيب ونار
اخبرك والگلب ذابل * يحيدر هالأمر لو صار
اريدك تصبر وتكظم * يظل بگرابه ذو الفـــقار
يدوم الدين من صبرك * ومن عنده تشع انوار
هذا آخر كلامك چان * وصيتك چانت الحيدر
ظليت اندب بحالي * وظــــــــــل حاير بطل خيبر
گمرنه غاب * جره الامصاب
***********
شفت دمعاتي يتجارن * حچيت ويايه بالآلآم
گتلي ياضوه عيوني * بعدي ماتطول ايام
شهيده انتي من بعدي * جنينچ تذبحه الظلام
اريدچ ماتــــــــــــــندبينه * يبويه حيدر الضرغام
يزهره آنّه وصيــــــــته * صبرك ياعلي المقدام
والله لو سمع صوتچ * يگلب هالبشر اقزام
رضينه بهالامر كله * حكمه وصارت اعلينه
حكمه الباري بيهه اعلم * بيهه يكتمل دينه
مثل دولاب * جره الامصاب
**********
طفت شمسي وصفت ظلمي * من جور وظلم طغيان
نسوهه كل احاديثك * يبويه وتركو القرآن
چثيره الناس مرتده * واحدهم صُبح شيطان
چذب چانو على دينك * گلبهم ماحوه الايمان
بضعتك آنّه يدروني * يبويه وخيرة النسوان
عليه منعو دموعي * ومنعو نوحي والاحزان
فدك اخذوهه من عندي * يبويه ونهبو آمالي
اشوف اولادي حيرانه * حال الضيم ياحالي
جمر لهاب * جره الامصاب
*********
شمل الأُمه يالهادي * گومك بالظلم فرقوه
گبرك مانشف بعده * دينك بالظهر طعنوه
زمره الخانت اعهودك * خليفه ظالم النصبوه
حقوق هوايه حرموني * كل ذاكه الورث نهبوه
بعدك ياابو الزهره * من حقه الوصي حرموه
بسقيفتهم جره كلشي * ظنهم نورك ايطفوه
رياح الهبيت اعلينه * يبويه طفت اشموعي
عليك انحب وجر حسره * من دم صارن دموعي
دليلي ذاب * جره المصاب
*******
يبويه الدار طوقوهه * هجمت بالغضب هالگوم
بابي بنار حرگوهـــــــــــــــــــه * بالسطره الوجه مالوم
خلف الباب عصروني * اصبح هالضـــــــــلع مهشوم
شفت مرسومه يم بابي * ضعوني اذياب ضدهه تحوم
شفت اولادي مذبـــــــــــــــــــــــوحه * عالغبره تسيل ادموم
يبويه وتدري بحســــــــــــــــــــــينك * مثل يومه فلا ظن يوم
كلهه بكربله تغادر * حسين وناسي احبابي
طف حسين رسسموله * بداية طفه بمصابي
تحوم اذياب * جره المصاب