زيـنب الكبره قادت الثوره من دمه العطشان
المنكَطع نـحره جسّدت نصره بصبر وبإيـمان
بضعن الخدّر والأيتام ردت منتصره من الشام
***
زينب مـدرسة إيـمان مـاتـخمد إرادتـها
ورثت مـن رسـول الله عِلمهاوحـزم حكمتها
ومن كَـلب الوصي حيدر ورثـت كل بـلاغتها
وكل صبر الحسن عـدها يواكـب صبـرمحنتها
جبل تـمشي ودموع العز تـثبّت عزم خطوتـها
وعـله يزيـد مـن طبت علنت غضب ثورتـها
روس ولياهـا دخلت اوياهـا يقودهـا الاصرار
الباري يتباهـا بصبربت طـه مـشعل الاحـرار
تسندهـا هموم وآلام ردت منتصره من الشام
***
إبتدت خطبتهـا بسم الله الإله الواحـدالاوحد
ومن أثنت عله المعبود وصلّت عالنبي الامجد
إبَّلاغـتهاإمتثل حـيدر وبيها المصطفه تجسّد
ارتفع صوت الشجاعه بنار عـله الاسماع يتردد
إبصداه الفـاجعه تشضّت صوارم غضب تتجرّد
ومن بين الجثث والروس عله ركَاب الظلم تمتد
كربلاء الـدم جروح تتبسّم من وريـد حسين
ولسحاب الهم زينب المنجم تنـزف بكل حين
وتـحدت جور الظلاّم ردت منتصره من الشام
***
أخذت إعلينه بـحقادك أقـطارالارض كلها
دخلنه المـجلسك أسره والـروس بعواسلها
إنْضَرتنه بعِطْفَك الجذلان مسرور الـحواملها
شُمخت بأنـفك إعلينه حرايرنـه إتّـأمّلها
شفت مُستوثـقه الدنيا إلك أصفت محافلها
تِضِن بينه عـله المعبود هَواده وبيك أسدلها
كل ملك جدنه إسلبته من عدنه يالدعي مهلك
واللي حـاربنه والسفك دمـنه ينتهـي ويهلك
وبصولة فـارس مقدام ردت منتصره من الشام
***
أمنل عـدل تـخديرك حرايـر آل ابوسفيان
ومثل سَوكَ التِرك تنساكَ بنات المصطفه العدنان
سبايـه ويـنحدي بيهن ويطـوفن عله البلدان
من بلـده لَعِـد بلـده ومن مجلس لَعِد ديوان
إلستر اوجـوهن أبديت وصارن فرجه للعربان
لاحـامـي اليحاميهن حـرم وبولية العدوان
لاوالـي عـدهن ولاحامي إلهن مابين الاجناب
مـن عكَب ابوهن يتصفّحـوهن الناس الاغراب
لامـاذلت للأيـام ردت منتصره من الشام
الدَواهي العاتيه التِعصف مُخاطبتك عَلَي تحكم
يَلن أستصغره القـدرك ولتقـريـحك أستـعظم
وستكـبره التـوبيخك وأطب ديـوانك أستهظم
إعله ثـغرالقبّله المختار مـقصرتك حِقـد تجثم
تتبجّـح بـأسلافـك وبشياخـك كَمت تِزعم
القتل حزب الله النُجّب بحزب شيطان ابن مُلجم
وبدمه الاطهار ترد عالمختار والهادي خصمك
زاهـق الابصار وبشنارالعـار يتخطـه جِدمك
للمنهج سنّت أحكام ردت منتصره من الشام
***
إسعه وناصبه الجهدك وكِدكيدك يطـاغي وكيد
لاوالله مـاتـمحـي ذكرنه شـما كِدت ييزيد
متميت الـوحي البينه ولاتـدرك أمدنـه بـإيد
أيـامك بدد تـمضي وكل شـمل الجمعته يبيد
مايرتخص عنك عار بشنارالملتوي إعـله الجيد
يـوم الينادي بصوته المنادي بلعنة الظلاّم
من دمه الهادي كـل الأيادي إملطّخه بآثام
زينب مدرسة الاسلام ردت منتصره من الشام
***
b
ابوياسر الکعبي