[الشاعر ابو لقاء البهادلي]

كالولي تحب كلت اليحب موعيب **** المايوفي بمحبــته تكثر اعيوبـــــــه

وادري باليحب يتحمل اللوعات **** ومن دمعه اليهله ايــصير مشــــروبه

كالو ياطبع مرغوب للعشاك ****كلت طبع الحبيب يصــون محـــــــــــبوبه

كالو وصفه المحبوبك بأيجاز **** وكللّنه الصفات البيـــه مـــرغوبــــــــــه

كتلهم صعب وصف الحبيب بساع **** لان قلعه حبيبي ومن ذهـب بوبــــه

يشع نوره بكماله وبالحسن ايات**** ومن اسمه تحس بيه اجمل اعذوبــه

يسري اويه الدمه حبه ويغذي بالارواح ****وعالفطره محبتي بلوح مكتوبه

حبيته محبه الماتحدهه احدود **** واعرّفنّه شيريد وشنهي مطلــــــــــــوبه

وبحر العشك غطيت حد الراس **** واقدس هالحبيب واعبــــــــد دروبـــه

مايحله العمر من دونه والايام **** واحس بدنيتي بليــــــــــــاه مكــــــلوبه

وعاداني الذي ماعنده كلب يحب ****وعليّه اهل الحسد والحقد مجـــــلوبه

كل ظنهم اعوفه الهالحبيب بيوم ****وظنّه الناصبي يخوفني باســــــــــلوبه

ماعوفن حبيبي اشماجره ويصير **** لوبالسيف كطعوني الف نوبــــــــــه

معقوله ايتخله اللي يحب باخلاص **** ويعوف اللي بمحبته تنمحي اذنوبه

حبيت الحسين بعالم الاصلاب **** ومن حبه ابد ماصيحن التوبــــــــــــــــه