ويسمونه حسيني وخادم اهل البيت***رادود القصيده لو قره بحسره
ويسمونه حسيني وتابع اهل البيت***كل واحد ينوح ولو لطم صدره
وميلوك اللقب بس للخدم باخلاص***وخلص كل حياته بخدمة العتره
الحسيني من صدك مسلم سفير حسين***كريم وبالشجاعه العالم يذكره
الحسيني من صدك عباس ابو الكلفات***بحب حسين ابد ما همته الكثره
وماهاب الجيوش ولا يهاب الاف***من حيدر اخذ عباس هالشـــــمره
لجل دينه وامامه ضحه بالاخوان*** اوهب دمه وحياته ويمنته وبسره
الحسيني من صدك عابس حبيب حسين***حب حسين جنه وقدمه العمره
الحسيني من صدك اصحاب ابو الاحرار***صارو للنبي انصار والزهره
ضحو بالدمه وقدمو اعز ارواح*** وكتبو للبشر درس والف عبــــــره
الحسيني من صدك كلمن نصر الحسين***ويظل حسين ينصر كلــمن ينصره
وحسيني اللي يصير حسين أله عنوان***بمنهاجه يسير ويقتــــــدي بأمره
وحسيني اللي اخذ من كربله العبرات***وذكر حسين يسري بروحه وبفكره
وحسيني اللي حضر مجلس لابو السجاد*يحضره بكل صدق واخلاص وبفطره
وحسيني اللي خفض جنحانه للربوه***جنح أيصير في الهم جنح كــــــمره
وحسيني الما يبيع أصحابه وكت الضيج***يصير الهم غطه لو بينت عوره
وحسيني اللي يتفانه بخدمه الاطهار***سمعه مايريد ولا يحــــــــــب شهره
وحسيني اللي وهب حب الجميع الناس***وباعماله وســـــلوكه الوادم تذكره
وحسيني اللي رضع طيبه وكرامه وزود***من صدر العقيده الصادقه الحره
وحسيني اللي حزن لمصاب أهل البيت***وكل مجلس يصير يصونه ويحضره
وحسيني الماتهزه الريح والصدمات***ولوجار الزمــــــــــــان ولوح بشره
وحسيني اللي يمد ايده بكرم للغير***ولوطاح الصديق يشيله ويعــــــــــبره
وحسيني المارفع صوته اعله صوت الحق***جي من الحسين الحق بزغ فجره
وحسيني الماتخوفه أهل الذبح وارهاب*** جبل عالي بشموخه ومحد يكسره
وحسيني اللي نكر اهل البدع والجور*** وعدوان العقيده منــــــهم اتبره
وحسيني المايخون اخوانه والوافوه *** ويصير الهم جسر لو طكت العبره
وحسيني هالقلم لوما يدور جاه *** وذكر حسين دوم بمنـــــطقه يسطره
وحسيني هاللقب تاج وفخر للناس*** وصـــعب هذا اللقب لو رايد اتفسره
وكل واحد حسيني يصير بالاخلاق **** ومن حزنه تعرفه ومن حجم صبره
وشاعرنه يحصل عاللقب لو راد*** بس لحسين يكتب يخدمه بشــــعره
وميسموه حسيني وشاعر اهل البيت***اليوم اهنا وباجر عنده جم سهره
واذا انته حسيني لقبتك هالناس*** عمرك هاذ للوادم تره اتنـــــــــــذره
ولو رايد تصول وتنكلب بركان *** بس حب الحسين يفجــــتـر الثوره