يسكنه لا تلوميني!!
يسكنه لا تلوميني-وعن الماي اعذريني
اكطعوا جفي انطفت عيني
يعمي لا تلومين
-----
يسكنه عَزمت للماي -من كتيلي عطشانه
اشلون العطش يوصلج -وعمج يمج اهنانه!
كصدت المشرعه ابزودي- شبل حيدر علي أنه
ابسيفي اليبتسم للموت -بيدي الرايه فَرحانه
اجعلت عايها واطيها
مثل حيدر وطب ليها
ابو فاضل تعرفيني
يعمي لا تلوميني
----
يسكنه من وصلت الماي- لكيته بارد اوريان
وَأنه إمن العطش ياعمي -بكَلبي تلهب النيران
اشلون اشرب صحت هيهات -لوما يرتوي العطشان
اخوي احسين روح الروح -ينطر ترتوي الرضعان
روحي لاجل اخوي اتهون
اشلون اشرب الماي اشلون
عسى المَي ما يرويني
يعمي لا تلوميني
-----
خذت نهر الفرات ابزود -حدت كدامي كل اعداي
وكفت اعله النهر وحدي -مليت الجِربَه واني ابهاي
اجتني الضربه من كل صوب -طاحت يسرتي اويمناي
اوعمود الصابني بالراس -بعده ما بقى كل راي!!!
عمج طايح ابمحنه
لا يسره ولا يمنه
ولا عين التدليني
يعمي لا تلوميني
----
ما همني بتر يمناي-يسكنه اولا عمود الراس
أهم اشلون حال احسين-لا راية ولا عباس
ضَل الوحده بالميدان- ولجتله تهم هالناس
وانه امكطعه اجفوفي-وهالموقف فلا ينقاس
نسيت البيه وشصاير
وبحسين الكَلب حاير
ابروحي افديه تدريني
يعمي لا تلوميني
خادم الحسين ع
حسين الساعدي