[سبع القنطره]

قصيدة (رضيعي)
على طور (الهي بسمك الاعظم)
رضيعي ....رضيعي من فگدته هاجت احزاني
ودموعي .....دموعي تجري نار و تحرگ اجفاني
شيصبرني على بعدك........انحنة ظهري إعلة فگدك
و دموعي تجري نار و تحرگ اجفاني
رضيعي إلي يناغيني بكل يوم ...... وتسحرني بسمتة
مناظر وجهه تجلي عني لهموم ..... اخذ گلبي بضحكتة
يوم الجاه ذاك القضا الميشوم ....... و أفرالة رگبتة
على چف الولي مخضب الدموم ...... يويلي من نظرتة
گلت آه ......گلت آه إعلة طفلي و نبض دلالي
و ويلاه ......و ويلاه إعلة حالي عگب هألغالي
بعد منهو اليردك........ انحنة ظهري إعلة فگدك
و دموعي تجري نار و تحرگ اجفاني
چنت طول الليالي أسهر إوياك ....بأفراح و أماني
إحلمت عريس يا ضي عيني ألگاك .... يا فرحة زماني
و إذا ذبني الزمن أحتمي بحماك .... و ألوذ بسدك آني
يا وسفة الزمن تاليهة بدماك .... هيِمني و دهاني
انة امك ........انة امك يا رضيعي واحلم بعرسك
واضمك ........واضمك بالسعادة و أفرح بهمسك
إنفجع گلبي اليودك........ انحنة ظهري إعلة فگدك
و دموعي تجري نار و تحرگ اجفاني
رضيعي و طول ليلي چنت اناغيه........ و يفرحني دلالة
و أصيحن يا إله الكون إحميه .... يا رب الجلالة
ما ظنيت يفجعني الدهر بيه .... و يفارگني جمالة
و أظل طول العمر أنحب و أناديه .... و يسامرني خيالة
كئيبة .... كئيبة صارت الايام من دونك
و صعوبة .... صعوبة أگدر انسة نظرة عيونك
فكر قلبي يجسدك........ انحنة ظهري إعلة فگدك
و دموعي تجري نار و تحرگ اجفاني
مظنيت الحلم يتبدد بساع ........واشوفك يبني يمي
على چفوف الأبو ومنزوع القناع.... بنحرك سهم مرمي
چنت منتظرتك و الگلب ملتاع .... وسف رديت مدمي
شمصعبهة علــَـي لحظات الوداع .... انفجعت و دمعي يهمي
فجيعه ......فجيعه يوم شفته السهمك بنحرك
وابيعه ......وابيعه لعمري كلة و أشتري عمرك
شتفيد أيامي بَعدَك ......... انحنة ظهري إعلة فگدك
و دموعي تجري نار و تحرگ اجفاني

يعبد الله وسافة بسهم الاحزان .... تصيبك آل أمية
على ذراع الحسين تموت عطشان .... تلوج إمن المنية
دم الي سال من منحرك القربان ... قدمتة هدية
للكرار علي و لسيد الاكوان .... و الزهرة الزچية
هديتة .... هديتة دمك إلي سال للعترة
فديتة .... فديتة و إجذبت يم مهدك العبرة
أنوح و خالي مهدك ..... إنحنة ظهري إعلة فگدك
و دموعي تجري نار و تحرگ اجفاني
إجاني صوت من منحرة المذبوح .... يا يمة إصبري
أريد انقل خبر يشفيلچ جروح .... يا يمة إبشري
رح أبقى فوگ صدر حسين وح .... و حنانة يصير گبري
و يجي المهدي بنحيب و دمعة النوح .... يصيح و دمعة يجري
يمفطوم .... يمفطوم بسهم و إتوجرت نارك
أنة اليوم .... أنة اليوم إعتنيتك آخذ بثارك

و دموعي تجري نار و تحرگ اجفاني