[روح العقيله]

قارنتك يا (علي) وية اليحكمـون
و لكَيتـك يا علي مفـرط بالأحكام
شني تحكم الدنيـة و عرشك بساط؟
و شـني بـ (جامع) مقر القائد العام
و شني عادي اليتيم يكضلك الباب؟
اليتيم يروح يسكن دار الأيتـام
جان ما عادهة و لا كضلك الباب
كـون بصدره قنبـر ساحب أقسـام
كل شئ يصير مدري يفخخ البيت
تحت مهـرك يجوز يحطلك ألغـام
علي شعلـيك اذا بالشـام جوعان؟
دشبع حزبك و نعله على ابو الشـام
تكَضـي الليـل تفتر و انت مسؤول
السياسـي الزين كون المغرب ينام
بين الناس تخطب..لا يبو حسـين
علي المفروض تخطب من ورا الجام
كثر نوكَ و اطلع موكب وياك
و أنشـر ع الدرب رمـاية سهـام
ناكَة مضللـة و تركبهـا ابو حسـين
و عمار أبن ياسـر كعدة جدام
و خل مالك الأشـتر كَبلك يفوت
يكَـطع سير كون الشارع العـام
عقـيل شراد منك حتى تجويه؟
اخيك هذا ضمه لضهرك حزام
كَبل ماكو دمج وتدمجه مولاااي
علي سجله سياسي بهدم الأصنام
شعجـب ولدك يا علي ما طلعو ايفاد؟
ددزهم ع البحـر يكضولهم عام
دبرلهم عذر خلهم يصيفـون
بحجـة مشـو دورة بنشـر الأسلام
علي تنطـي الخبز تتلثم شبيك؟
جا ما كشفت وجهـك للأعلام
جا مـا صار بينه الصـار مولاي
و ضـل ياهو اليجي و كَال أناا ابو لثام

للمبدع نهاد الخيكاني