يجي وكت العتب واتعاتب وياك
واخليهن بديك ذنوبك وياي
انة الشلتك جمر يحرك بالجفوف
واضل خايف عليك ايلوحك الماي
أثر سهم المضة منك اداوي
واحضرلي مكان السهمك الجاي
اتلكة الحزن منك واهم بيك
وياملكة اليسرك مثل ملكاي
مثل صبير اموت من العطش موت
اشرب دمعتي وماخسرك الماي
وكل روحي صبر واتحمل جروح
اجرح لا تخاف اتحمل هواي
صبيرة وصديق العطش يفلان
حسبالك أذل من تكطع الماي
هينة اشما شفت منك اجازيك
اردهه اضعاف الك دكاتك وياي
شجرة اني واكيد اتردلي فد يوم
من ادكك شمس وادور فياي
تاخذ يسرتي ساعتهه يفلان
كل زين الالك منطيتة يمناي
اتحاسب وياك الجرح بثنين
اعوف الراح الك بس اخذ الجاي