من تجارب متزوج

بسم الله الرحمن الرحيم
اللهم صلي على محمد وآل محمد وعجل فرجهم ياكريم

السلام عليكم ورحمة الله وبركاته .. شلونكم شخباركم ؟.؟ .. أتمنى تكونون بخير إن شاء الله اعزائي ..

هذا الموضوع تمت كتابته باللهجة الكويتية .. اتمنى تكون واضحة لأخواننا في دول الخليج

وايد اقرا مواضيع تخص الزواج وكيفية تعامل الزوج مع زوجته سواء في المنتديات أو عبر الرسائل اللي توصلي على الايميل ..
تعلمنا كيفية التعامل بكل المواقف مع الزوجة .. احطلكم امثلة .. والصراحة من الآخر اشوفها تنفع حق الافلام الرومانسية مو حق الحياة الزوجية .. وبالغصب بالغصب يضبطونها بالمسلسلات مثل هالحركات ..
فما بالكم بالواقع الزوجي بين الريال وزوجته محد فاضي يسوي هالحركات الصراحة ! .. وأظن الكل بيوافقني عليها .. هذي أمثلة لكيفية التعامل ..

عندما تمشى مبتعدة عنك (إلحق بها) >> يستحب تبمبع و تقول بااااع .. بااااع .. عشان تكمل وتصير خروف بعد مرة وحدة !

عندما تدفعك أو تضربك ( امسك بها ولا تتركها )

عندما تطيل لسانها عليك ( قبلها وقل لها انك تحبها ) >> عن نفسي يمكن أقص لسانها وأسويه باجة وآكلة الصراحة !!

عندما تكون صامته ( اسألها ما المشكلة ) >> ماكو شغل .. أبركها ساعة أحس شوية هدووء بالبيت .. أييب عوار قلب حقي ليش ؟.!

عندما تراها تبكي ( أحضنها ولا تقل شيئاً )>> هذا شي جميل .. وماعاش اللي يبجي زوجة المستقبل إن شاء الله ..

هذي بعض الأمثلة اللي تنصحنا بكيفية التعامل مع الزوجة بعد الزواج .. شرايكم يالمتزوجين في مرة سويتوها ونفعت ؟

ويا أيتها الزيجات .. شرايكم بهالطرق تنفع معاكم يعني وتخليكم تهدون أعصابكم ؟.؟

------------------------------------------------------------------

جميع هذه النصائح والإرشادات في الحياة الزوجية تعلمتها من خلال اصدقائي المتزوجون ومن خلال ارشادات الاهل ..
لذى هذه النصائح أولاً أوجهها لنفسي .. وثانياً لكل من يحب العمل بها ..

عناد الحريم شلون اعالجه ؟
من اللي اشوفه بالمجتمع وشفته انه الحريم كله يعاندون الأزواج .. خاصة اللي صار على زواجهم مدة قصيرة وتشوفهم مو مرتاحين بسبب العناد
طبعاً اللي شفته سبب عناد الحريم اهو عناد الريال نفسه .. مايعطي زوجته خبر اذا بيطلع من البيت .. مايشاورها في الأمور المنزلية أو مايهتم لرايها .. أو يسمع كلامها ..

يعني اشوفه بسبب الريال من الاساس .. الريال مخه يصير صغير .. والحرمة بعدين مخها يصير اصغر ..

ياخي تبي زوجتك تسمع كلامك .. اسمع كلامها انته بعد خل تحس انها مهمة بحياتك ..

طبعاً الكل يدري الحرمة عاطفية اكثر مما تكون عقلية .. لازم الواحد يسايسها شوية بالعقل وشوية بالعاطفة .. هذا حسب ما اتعلمه من اصدقائي ..

يقولون لي لازم تكون سياسي معاها وعاطفي .. عشان تخلي زوجتك تسمع الكلام واهي مرتاحة ومقتنعة باللي تقولها اياه ..

ثاني مشكلة اشوفها بالعناد .. او مشكلة تخلي الزوجة تسوي اشياء من ورا زوجها من غير علمه

مثلاً تطلع مع رفيجاتها وماتعطي خبر حق زوجها .. اعرف ناس تطلقو بسبب هالشي .. طبعاً الغلط كان على البنت حسب ماسمعته .. والله اعلم ..
امور تستدعي البنت تسوي اي شي من ورا زوجها بس عشان تحس إنها عايشة بهالحياة .. تشعر بهالأمور إنها غير مسلوبة الإرادة .. بس شاللي يجبر الزوجة تسوي مثل هالأمور ؟.؟

طبعاً بسبب الرجل أو الزوج .. كله يمنعها ويرفض طلباتها من غير سبب .. كله يقول لأ , لأ , لأ .. على كل شي ..
يمكن عباله جذي يفرض سيطرته أو يطلع رجولته ويبين حق زوجته إنه اهو الكلمة الاولى و الأخيرة بيده .. اهو ريال البيت على قولتهم
تحت منطق الرجال قوامون على النساء .. وطبعاً أشوف هذا تعقيد ..

ومايدري انه بتصرفاته مثل هذي يجبر البنت انها تطلع من وراه او تسوي شي مايحبه من غير علمه .. كن على ثقة لو عاملت زوجتك هالمعاملة
بتسوي اموور من ورااك .. كـُن على ثقة .. فأهتم لزوجتك حبيبي واحسب لها الف حساب وحساب .. ترى هذي بنت ناس لها مشاعرها وشخصيتها وإرادتها ..
لاتحاول تسلبهم اياها تراك انته الخسران ..

يعني ما أقولكم خلوهم يطلعون على كيفهم .. ولا تمنعونهم خير شر عن طلباتهم ..

اذا قلتلها لأ ماتسوين جذي .. فهمها بالكلام الحلو و بالعقل وعطها اسبابك .. بعدين اهي تقتنع وتشوف كلامك صح وتسمع كلامك بعدين ..
مثلاً عن نفسي ماحب زوجتي تطلع مع رفيجاتها وايد .. ومو أي مكان أخليها تطلع معاهم .. اكو اماكن ماتنفع حق طلعة بنات ولازم البنات يعرفون هالشي ..

يارجل انتبه للمرأة
انا مابي اقولك كلام الامام علي عليه السلام واقول .. المرأة ريحانة وليست بـ كَهرمانة ..
والكهرمانة معناها الجارية أو الخادمة ..

انتو فاهمين الحمدلله .. بس يمكن هالكلام يحتاج نقربه بأمثلة ..

يا اخواني ترى الحريم مثل السيارة .. انته تحب سيارتك تكون نظيفة صح ؟.؟

تحب سيارتك تمشي معاك لطول عمرك صح ؟.؟
تحب سيارتك تكون عملية صح ؟.؟

إذن اهتم بسيارتك .. وطبعاً كل واحد قبل لايشتري السيارة يكون مخطط حق مواصفات السيارة شلون يبيها تكون .. اكيد عنده مواصفات معينة يحب توافرها بالسيارة ..
فلذلك على هذا الاساس يروح يشتري السيارة اللي يبيها ويحبها بسبب مواصفاتها .. مو ياخذله سيارة بعدين ماتعجبه ومايرتاح معاها ويبيعها بعدين وآخر شي يتعب نفسه ..

هذي سيارة لازم اخوي ماتدووس عالبنزين وايد ترى اتعب السيارة وتنقص من عمرها الصراحة ..
ولا لازم تشيل ريلك عن البنزين بعدين السيارة مكينتها تكربن وتخترب عالآخر بعدين ..

يعني

لاتكن صلباً فتكسر .. ولا ليناً فتعصر ..

البنت مثل الفخار ياخوي .. مثل الطينة .. بيدك تشكلها حسب ماتحب فهل أنت فنان ماهر ؟

البنت مثل السفينة وانته القبطان .. فهل راح تتحكم فيها عدل وماتخلي هالسفينة تغرق في بحر الحياة الزوجية ؟

هل مرت سفينتكم في العواصف وبأمواج البحر العاتية وطلعت منها سالم انته وسفينتك ؟

طبعاً أخواني وأخواتي الكرام ننبه على أن كل ماسبق ذكره من أمثلة فهي من باب " الأمثلة تضرب ولا تقاس "

فنحن لانعتبر الزوجة كالسيارة ونعاملها مثلما نعامل السيارة .. فقط من تحت بند التوضيح لاغير ..

يتبع إن شاء الله تعالى

السلام عليكم ورحمة الله وبركاته


الحين هالكلام اوجهه حق العزوبية اللي مثلي و أمثالي
طبعاً كل متزوج الحين لو تسأله وأي متزوج .. لو تقوله شلونها الحياة الزوجية .. فراح يقولك لازم يضحي كلا الطرفين
بأمور معينة عشان يجتازون المشاكل والخلافات بينهم .


فعشان جذي انتبه ياخوي المقبل على الزواج .. انتبهي اختي المقبلة عالزواج ..


اخوي لما قلنا و وضحنا بالمثال السابق " السيارة " قبل لاتشتريها تفكر بالمواصفات اللي تحب توافرها فيها ومميزاتها .. فكر بعد بالزوجة المستقبلية وبالمواصفات
اللي تحب تتوافر فيها عشان بعدين لاتصير مشاكل بينك وبينها .. وتقلل نسبة المشاكل واختلاف وجهة النظر بينك وبينها عشان لايتعب الطرفين ويضحون على قولتهم حق بعض ويتعبون ..


مثال
انا لو بتزوج باجر .. مابي آخذلي وحدة تلبس بدل وبعدين بقولها تعالي أنا أبيج تلبسين عباية رااس !! .. يعني الصراحة ماترضى البنت ولا يصير أجبرها بعدين على شي ماتحبه ..
أقل مافيها تقولي انته لما تزوجتني تدري إني أنا جذي ليش تزوجتني من الاساس ؟؟ .. وبعدين لو سمعت كلامك بتكون متضايقة وعند نفسها مضحية وايد عشانك ..


ما أقولكم لاتتزوجون اللي يلبسون بدل .. بس لو انعجبت فيها وحبيت تتزوجها اشرط عليها هالشي من الأول ..


القصد
اخذلك وحدة اللي يحبها قلبك .. تكون المواصفات اللي تبيها جاهزة مجهزة فيها .. عشان لاتزيد طلباتك وطلباتها .. وتزيد التضحيات بينك وبينها .. وتتضايقون اثنينكم ..


شلون البيئة اللي تربيت عليها ؟ .. اخذلك وحدة متربية على نفس هالبيئة اللي تربيت عليها .. يتراوالي بتتوافق أوجه نظركم وايد ..


سواء تربيت في بيئة منفتحة إجتماعياً .. اخذلك اللي تناسبك من هالبيئة المنفتحة ..
وسواء تربيت في بيئة وبيت محافظ .. اخذلك وحدة من نفس البيئة فإهي اللي راح تناسبك ..


اما زواج يكون قائم على حبيتها وحبتني .. ولا حب من اول نظرة .. كلام بطيخ وهذا اللي يسبب الطلاق ..


تدرون انه الكويت المركز الثاني بالعالم بالطلاق بعد الولايات المتحدة الامريكية حسب آخر إحصائية ؟.؟

ترى هذا مايصير من غير سبب ..


أحنه شكثر نقول الله يرحم حريم أيام زمان .. حريم أيام شرق .. حريم مال أوّل .. ايييه .. صج الأول تحوّل ..
قبل أبهاتنا كانو يزفون امهاتنا زف .. ماقالو خل نروح بيت اهلنا .. كان الريال الأول و الأخير في حياتهم ..
بس الحين هالزمن الريال لو فيه خير خل يتجرأ ويقول كلمة حق زوجته .. على طوول بتشيل قشها البنت وتروح عند اهلها !!

وهذا لأنه البنت صارت تشوف نفسها مستقلة بحياتها .. سيارتها تحت ريلها .. شغل وتشتغل ومعاشها في جيبها كل شهر ..
وبالطقاق بالريال يقولون .. وين رحتي ؟ .. وين ييتي ؟ .. هالمكان لاتطلعين .. وهالمكان لاتروحين ؟ ..

شلنا بعوار الراس ؟

كلمة يقولونها أغلب النساء المتطلقات .. باجر زوجنا يطلقنا .. ويوفر لنا الشقة من معاشه الخاص و النفقة ..

وانا مرتاحة في بالي .. اطلع وين ما أبي .. ومتى ما أبي .. والمعاش موجود بجيبي !!

زمن تعيس ويضيق الخلق .. على أتفه الأسباب تشوفون الطلاق قام يصير .. اللي مايصدقني خل يروح المحاكم ويشوف ..



اخواني واخواتي العزوبية .. قبل لاتدخل مرحلة الزواج احرص على انك تتزوج الزوج المناسب .. لما بتخطبها اشرط شروطك واهي خل تشرط شروطها ..
لاتدخلون في مرحلة مثل مرحلة الزواج تراها كبيرة هالمرحلة فلا تدخلها وانته ارضيتك ضعيفة بسبب انك استعجلت بالزواج .. مستقبل حياتك وعيالك كلها تعتمد على الزوج الصالح .. فتريّث وفكر وأخذلك اللي يناسبك لحياة زوجية سعيدة ..


يتبع إن شاء الله تعالى

[محبة الاطهار]

تسلم يمينك على الطرح الاكثر من روعه
رائع طرحك
يعطيك ربي العافيه
بنتظار جديدك المميز
...}

بسم الله الرحمن الرحيم
اللهم صلي على محمد وآل محمد
السلام عليكم ورحمة الله وبركاته

أنا استغرب من الرياييل اللي يصرخون على حريمهم .. أو يمد ايده عليهم يطقهم ..
شنو يعني بهالحركات تصير ريال وتطلع رجولتك بهالطريقة على زوجتك ؟ .. ترى زوجتك متوقعة متزوجة ريال .. لو تدري بهذي
اخلاقك جان قعدت في بيت اهلها اشرف لها الصراحة .. تراك مو شاريها بفلوسك .. بنت ناس هذي لها اهلها ولها كرامتها ..

يا خوي يالمتزوج

يافلان إبن فلان .. و ياعبد الله إبن أمة الله .. إفهممم .. إعلممم .. إن الموت حق .. وإن النشور حق .. وإن سؤال منكر ونكيراً حق ..

إفهمممم .. إعلمممم ..



اللي يطق مرته مو ريال ..
اللي يصرخ على مرته مو ريال ..
واللي مايخاف من مرته بعد مو ريال ..

لايكون عبالكم انه لازم تبين حق مرتك العين الحمرة بتصير ريال ؟ .. لايكون عبالك لما تطقها بتصير جذي ريال ؟ .. أو لما تتحكم فيها صرت ريال البيت يعني ؟ .. أو لما تبين لها إنك ماتخاف منها بتكون ريال ؟.!
ترى ياما حريم شالو بيوتهم وتعبو على تربية عيالهم بروحهم .. بنظرك صارو رياييل يعني هالحريم ؟.!

ياخي الزوجة وردة .. ترى هذي اللي رضت فيك كزوج تكون لها .. توقعت انك تشيلها على راسك .. ترى هالبنت في بيتهم وردة ابوها .. مو مقصرين بحقها شي ..
لاتخليها تدش في بيتك الا وهي معززة مكرمة .. جابلها بالاخلاق الحلوة .. خلها تعرف تبدعلك بجمالها وأخلاقها .. كل يوم تعطيك شكل يديد مسويته بروحها ..

مو تعيشها في حالة رعب وقلق وتخليها ماتشتهي تشوف رقعة ويهك .. أو انها تترقب الساعة لما تطلع لحين رجوعك حق البيت ..

زوجة صديقي بيوم من الايام صادفت حالة .. اهي تشتغل بالروضة .. شافو الولد كله يشتم الأبلات بالألفاظ النابية القبيحة .. ولد بالروضة ترى ياهل ..
استغربو المدرسات وراحو دقو على الأماية عشان يشوفون شسالفة هالولد .. ولما وصلت شافو الام وسألوها .. ولا الأم طلعت لهم ايدها شافوها كلها آثار طق عليها !!

ولا جان تقولهم .. هذا أبوهم مينون مو صاحي .. يشوف أفلام الرعب ويطبق علي وعلى عياله بالبيت وعشان جذي صارو معقدين !!
ومسكينة هذي صابرة عشان عيالها .. ولا الخبل اللي عندها صراحة مايستاهل ..

دايماً حسس زوجتك إنها ملكة جمال الكون وماكو احلى منها .. ولو قلت شيفة وجيكرة .. تراك انته اللي صرت مينون بجمالها وتزوجتها .. ولاتقول عن ذوقك جيكر وشيفة ..
محد طقك على ايدك وقالك روح تزوج بنت الناس .. ترى محد جبرك عالزواج بهالبنية عشان ماتعاملها عدل بيوم من الأيام ..

مابطول بالكلام وبالنهاية اقول
شوفلك اي حالة زواج سعيدة .. وأسألهم عن السبب .. صدقني بتشوفهم يقولون لك

اللي مايخاف من مرته مو ريال

صدقني حط هذي قاعدة في حياتك بكل شي .. وبتشوف شلون حياتك بتمشي سعيدة .. وبتكون احسن ريال بعين زوجتك ..
بس بيني وبينك اذا شفت زوجتك مصختها ..
عطها زئير الأسد عشان تأدبها بين الحين و الآخر .. فكما ذكرنا " لاتكن صلباً فتكسر ولا ليناً فتعصر " ..

ماقلنا صير سكانه مرته

يتبع إن شاء الله تعالى

السلام عليكم

هل حلمت بأن تكون مبدعاً ؟ .. شخص يحب الإبداع في أمر ما ؟ .. مثل الرسام دافنشي أو رامبرانت ؟
هل تظن نفسك قادراً على الإبداع يوماً ما ؟

إغمض عينيك معي للحظة وتخيل حياتك الزوجية في لوحة رسم .. هل ترى هذه اللوحة في مخيلتك ذات ألوان باهتة أو زاهية ؟

فكر وراجع نفسك هل أنت تعيش بإرتياح أثناء تواجدك بالمنزل بجوار زوجتك ؟ .. أم تريد الإبتعاد عنها كل البُعد ؟

إن كنت حديث الزواج من زوجتك .. هل تستطيع أن تتخيل بأنه سيصيبك الملل منها يوماً وتود أن تقوم بالتغيير ؟.؟

و تخيل حياتك الزوجية عبارة عن لوحة رسم .. فكيف تريد أن تقوم برسمها ؟
هل تحب أن ترسمها بألوان قاتمة وباهتة توحي على النفس بالتشاؤم و بإضطرابها ؟
أم تحب أن تقوم برسمها بألوان زاهية تدخل فيها على النفس الراحة و الطمأنينة حين رؤيتك لما قمت برسمه ؟

طبعاً تحب ان ترسمها بأحب الألوان إليك مثل الأزرق الفاتح أو البرتقالي والأحمر .. مثلما تتخيل الفتاة بأن مرحلة الزواج كلها باللون الوردي ..
فإسعى لكي ترسمها فقط بمثل هذه الألوان الجميلة الزاهية .. لأنك يوماً ما إن قمت بتلطيخها ولو عن طريق الخطأ باللون الأسود فلن تستطيع مسحه ..


اللي مايخاف من زوجته مو ريال
... أجمل مقولة من حياة زوجية سعيدة رأيت شخص يعيشها بوقت السفر ...

طبعاً اصدقائي كلهم متزوجين ولله الحمد .. وأصدقائي أشكال وألوان .. فمثل هذه التجارب تعلمتها من اصدقائي بالسفر للدراسة بإحدى الجامعات الغربية ..
طبعاً مثل مايقولون .. الصديق تعرفه بوقت السفر .. فكل شخص بوقت السفر تبين طبيعة حياته الزوجية بشكل واضح ..

أصدقائي منهم الخيّر ومنهم اللي الله يستر عليه .. راح نضرب مجرد أمثلة للي شفته من خلال عشرتي وياهم بشكل مختصر ..

المثال الأول
شخص عمره بالـ 40 سنة .. يدرس معانه وإلى يومكم ماتخرج !! .. مايبي يتخرج أصلاً .. صدقني يفتخر ويقولنا انا اتذرع بالدراسة بس عشان انحاش عن بيتي وعيالي !!
وهالريال الله يسلمكم 6 اشهر بالسنة يسافر بعيد عن زوجته وعياله وبيته .. وتصل سفراته إلى شهرين عادي .. طبعاً الله يعين زوجته الصراحة .. الحريم يقدرون يتخيلون شكثر صعب عليهم مثل هالإنسان ..

المثال الثاني
من أصدقائي اللي مايعبر زوجته خير شر ولا يفكر يدق عليها إلا بالأسبوع مرة .. ولما أسأله وأقوله ليش جذي تسوي
دق إسأل عن زوجتك طمنها عليك لاتحاتيك .. يجاوبني ويقول خل اخليها احسن ..

مابتعرف قدري الا لما تجرب غيري
صاحب هذه المقولة ارى حياته عادية جداً .. مجرد روتين يقضيه كل يوم .. لايوجد شئ مميز في حياته كما رأيت حتى بالكويت ..
حسب اللي اشوفه منه كل يوم يروح قهوة وغالباً يطلع مع ربعه .. روتين ممل اشوفه ..

المثال الثالث
واحد كله يضحك بشوش وصاحب اخلاق جميلة جداً .. هذا الله يسلمكم من غير مبالغة لو تشوفه طول الوقت كله مبتسم .. لما تشوفه تحس بهمومك وضيقة خلقك تطلع من صدرك ..
الله يسلمكم هذا نسميه علاقته مع زوجته بطيور الكناري أو طيور الحب .. لما تتصل عليه زوجته واحنه مسافرين تشوفه كأنه روحه رجعت للحياة .. يقوم يفز لها ويروح يكلمها ويتطمن عليها ..
نطلع برى نروح نفتر بالمجمعات وبالقطارات وبأي دولة نسافر لها كله تحصله ماسك تلفونه ويحادث زوجته عن طريق المسجات .. عمر الرجل 35 سنة تقريباً وعنده منها 3 أولاد .. ولما تشوفه تقول توة متزوج !

الله يهنيه ..

المثال الرابع
وهذا أفضل وأحلى حياة زوجية شفتها .. وصاحبها هذه الحالة صاحب مقولة
اللي مايخاف من زوجته مو ريال

هذا شخص الله يسلمكم مبدع بكل معنى الكلمة .. يخلق الإبداع عشان يفرّح زوجته .. شخص مرح وفكاهي وايد ..
شخص يبحث عن اللي يدخل الفرح بقلب زوجته ويسويه لها .. لي درجة تصل للجنون .. ومايسعفني الوقت اقول الامور اللي يسويها لها ..
ولكنه مبدع .. يبحث عن كيفية إسعاد زوجته بشتى الوسائل .. وهذا الصراحة اسعد إنسان شفته يعيش حياة زوجية سعيدة أكثر من الباقين ..

ليش أنا ما نسعى لمثل النموذج الرابع أو الثالث على أضعف الإيمان ؟

عزيزي المتزوج
تخيل انك زارع وردة نادرة وجميلة في بيتكم .. شكثر تهتم بهالوردة وتحطلها افضل انواع التربة وتسقيها الماي وتعرضها لأشعة الشمس بالوقت المناسب ؟

ماتنتظر نفسك تلاحظ على الوردة انها تذبل عشان تسعى خلف إنعاشها والإهتمام بها .. ولا تسقيها من الماي وتوفر لها اشعة الشمس اكثر من اللازم عشان تموت ..

عزيزي الرجل المرأة هي هذه الوردة
وفر لها حبك وحنانك وإسعى لإرضائها والبحث عن سعادتها ووفر لها هذه الأمور بالحجم المناسب .. لاتنطرها تقولك ناقصني هالشي ودي توفره حقي ..
روح شوف شناقصها زوجتك .. وحاول توفره حقها عشان تفرحها قبل لاتتكلم .. وبتشوف بعدها شلون انته بترتاح بعدين وتربيها وتشكل طينتها على راحتك ..

كُن شخص صاحب إبداع في حياتك الزوجية
فالمرأة هي تلك اللوحة الفنية .. فكن مبدعاً معها ..

يتبع إن شاء الله تعالى

السلام عليكم
شلونكم شخباركم اخواني ؟


لعل البعض يفكر ويقول بنفسه شيخربط علينا هالعزوبي اللي ماذاق طعم الزواج ؟.! .. ياي ينصحنا ويبي يعلمنا شلون نسيّر أمور حياتنا الزوجية !

باجر بيتزوج وخل نشوف شلون يقدر يطبق مثل هالأمور !

الصراحة عن نفسي مادري .. الأيام بتدور وإن شاء الله نتزوج ونشوف نقدر عليها ولا لأ ..

والصراحة بنظرتي الخاصة اشوف هذا كله يعتمد على المرأة الشاطرة الزينة اللي تعرف شلون تطلع مواهب زوجها الخارقة لها ..

انا مثل ماقلتلكم بالمقام الأول أعلم نفسي وأروي لكم تجارب غيري .. علماً بأني أعرف مطلقين كذلك فنتعلم من أخطائهم ..

كًن صاحب ابداع في حياتك الزوجية

يمكن البعض يتسائل ويقول شلون يعني أكون صاحب إبداع في حياتي الزوجية ؟.!

للإبداع خطوات حبيبي .. أولها تتعلم علم النساء ..
شنو اهو علم النساء ؟

الحريم أشكال وأنواع .. يمكن تشوف زوجتك صاحبة شخصية قوية , متسلطة والله يعينك لو كانت زوجتك متسلطة
ويمكن تكون زوجتك مسكينة على قد نياتها وحنونة ومو شايفة هالدنيا التعبانة .. ويابختك لو كانت زوجتك على هالصنف إهتم فيها عدل مدل لاتفرط بحنانها ..
والله ياخوي ترى حتى لو زوجتك كانت صاحبة شخصية قوية .. ترى الحديد مالان بيد سيدنا داوود عليه السلام بمعجزة .. هذا كله علم كان عند الانبياء ..

وايد حريم عندنا .. باجر وراي زواج .. وانتو يمكن تكونون متزوجين .. فشلون أبدع لهم عشان أفرحهم وأنا ماعرف لهم ؟.!

علم النساء اهو عزيزي مثل علم النجوم وأي علم ثاني
كل واحد فينا عنده شهادة بهالزمن ولله الحمد .. عن نفسي ادرس علم الهندسة المدنية .. لما دخلت مرحلة التعليم هذي ماعلموني شلون أبني عمارة على طوول !
علموني أساسيات هذا العلم مثل خصائص التربة وقوة تحمل الخرسانة .. بعدها علموني الخرسانة المسلحة بحديد التسليح وكيفية تسليحها .. وبعدها نتعمق
أكثر وأكثر حتى يعلمونا كيفية بناء عمارة كاملة إن شاء الله تكون ناطحة سحاب ..

علم النساء كذلك لما بتزوج لازم أعرف المرأة شلون صايرة
ماقلتلك تعمق فيها على طوول ماراح تفهم شي .. تعلم الأساسيات بعدها تعمق على كيفك ..

أول درس

الخصال اللي تكرهها المرأة في الرجل .. حاول تبتعد عنها
1- الخاين .
2- عديم الإحساس .
3- اللي يجرح البنت .
4- اللي يطلع رجولته براسها .
5- اللي يهينها .
6- دياية أمه " دلوع يعني " وهذي نشوفها وايد هالزمن .. اقصد اي شي يصير بينك وبين زوجتك مثل المشاكل .. لاتطلعها لأهلك أو لأي كائن كان .. إن شاء الله قلبك ينفجر من المشاكل .. بس لاتطلع برة بيتكم ..

هذي اكثر خصلة البنات مايحبونها بالريال .. تبي تعرف شنو ؟.!

7- تكره الواحد الغبي اللي مايفهم اهي شنو تبي بسرعة !

تتسائل بينك وبين نفسك ليش صح ؟

تعال خل ندرس الدرس الثاني حق الحريم

الدرس الثاني
ترجمة لغة المرأة للرجل

نعم = لا

لا = نعم

بعض المرات تسأل زوجتك قاصرج شي ؟

بتجاوبك لأ .. لاتظن يا رجل إنك مو مقصر بحقها .. كن متيقن إنك مقصر بحقها .. بس ليش تقولك لأ ؟
لأنه سؤالك لها وإهتمامك فيها يكون بمثابة الدنيا ومافيها لها فعشان جذي تقولك لأ ..
أو لأنها تحبك وتموت فيك وماتبي تشغل بالك بشي أو تكلف عليك .. فإحرص على هالزوجة اللي لو كل مرة تسألها عن حالتها وتقولك لأ عشان تريحك .. لأنه تحبك وايد ..
إحرص على راحتها وإخلق الإبداع عشانها .. وبيع نفسك بالسوق بس عشان تشوف ابتسامتها على الويه وتشوف شمس ثانية اول الصبح تشرق بويهك ..

الله يرزقنا هاليوم ادعيلي ..

ممكن = مستحيل

مستحيل = ترجاني أكثر

شوف هالبدلة شحلاتهااا = اشترلي اياها

وييييه موبايلي اخترب = أشتر لي واحد جديد

أنا رح اتأخر شوي = شوي (يعني 4-5 ساعات)

القرار قرارك حبيبي = يا ويلك اذا ما سويت اللي قلتلك عنه

سوو اللي يريحك حبيبي = راح تدفع الثمن غااااالي

خلينا نتناقش بالموضوع اكثر = اللي براسي راح أسويه

لا عادي أنا مو زعلانة = اسألني أكثر وراضني

لازمني شوية اثاث بالبيت = أنا رح اغير الاثاث كله

أنا اسمع صوت مزعج وأنا نايمة = أنت تشخر وأنت ناايم

دقيقة ورح أجهز = شوفلك فيلم بو ساعة ساعتين لأني مطولة

في أشياء لازم نتعلمها فحياتنا = لازم تتعلم تسمع كلامي >> تضحكني هالجملة

طيب طيب سامعتك اي فاهمة = لاحياة لمن تنادي

أنت سامعني يا حبيبي؟؟ = أنت اصمخ؟ ليش ما ترد؟؟

حبيبي اتحبني؟ = ادري تحبني بس ابي أطلب طلب

حبيبي اشكثر اتحبني؟؟؟ = انا امسويه مصيبة

يتبع إن شاء الله تعالى

السلام عليكم ورحمة الله وبركاته

" نظرة شخصية "

تيقني أيتها المرأة
تيقني انه بكل رجل يتواجد فيه طفل لايتجاوز عمره عن الـ 7 سنوات .. هذا الطفل يحب الحرية .. مايحب أحد يطول لسانه عليه ..
يحب يشعر بالحنان من مصدر الحنان واهو الزوجة طبعاً .. يحب احد يدلعه .. يحب احد يهتم فيه بكل النواحي .. ويحب التملك !!


اختي انصحج لاتخلينه يتملكج هالزوج
تدرين ليش ؟


لاتفهمينها غلط وتسوين اللي تبينه بكيفج تحت بند انه مايتملكج .. لأ لاتفكرين جذي .. اقصد صيري بعينه احلى لعبة واحلى حلاوة ..
وهالحلاوة أو هاللعبة لاتخلينها يمل منها .. لأنه لو مل منها بعدها يحب ينوع ويشوف حلاوة حلوة غيرها أو لعبة يسلي نفسه فيها ..
لأنه مثل ماقلتلج الرجل يتواجد فيه ياهل .. هالياهل الله يسلمج لو تاخذين منه حلاوة او لعبة يقعد يبجي ويوصل صراخة لي سابع سما
بس عشان يحصل اللي يبيه .. وبعدين لو حصله راح يلعب فيه شوية ويمل منه ويقطه .. ومتى ماطق براسه يلعب بهاللعبة بعدين ..


فأنتي صيري ذكية وعرفي شلون تتعاملين مع الزوج بحنية وبحذر وبشطارة .. بحيث إنه تخلينه مايمل منج .. ويخاف منج ويحترمج
مثل ما كان ولازال يحترم أمه ولا يفكر يسوي شي يزعله .. عامليه بشطارة يا اختي ..

الزواج المثالي يبيله الزوجة الشاطرة .. وطبعاً يبيله الزوج الشاطر بعد ..



__________________________________________________ _____________
__________________________________________________ _____________



اخواني .. شلونكم شخباركم ؟


اخواني احنه لازم نتكاتف مع بعض ونعامل أم عيالنا عدل .. ترى هالحريم كل يوم طالعين لنا ومسوين علينا مظاهرات ومنظمات حماية حقوق المرأة وطلب المساواة
وجان زين يصير مساواة بينه وبينهم .. يمكن نكسر خاطرهم .. خل جم يوم يجربون هالحريم احنه شكثر نتعب معاهم ونعاني واحنه نكد عالبيت وعلى ملابسهم ومصاريفهم
اللي ماتخلص وعلى حنتهم اللي اتييب المرض لو قصرت بحقهم ولو بالغلط " يعني سهواً وليس عمداً بعد ! " .. لا وهذا غير الطشار اللي يحوشنا منهم
و يسبب لنا إنهيارات عصبية في بعض الحالات إذا ماوصلت حالتنا معاهم بعد إلى انهم يقطونا في مستشفى الطب النفسي بسبب الحالات النفسية اللي تصير فينا بسببهم


بس اهم شي إذا صار المساواة بينا وبينهم وتبادل الادوار مانبي ننطر 9 شهور مو وظيفتنا الصراحة هذي !


حس فيهم يا ريال .. هذي 9 اشهر تشيل حشاشة يوفك في بطنها .. ولما تولد تقعد ترضع بولدك واهي واقفة وقاعدة ونايمة بعد ..


انته جرب وشيل ولدك لمدة 3 ساعات بس .. وشوف نفسك تتحمل ولا لأ .. ماقلتلك 9 اشهر شيله وين ماتروح يكون معاك .. بس 3 ساعات ..


وبعدها حاول يصحى ضميرك لو كان نايم .. وخلك صاحب ضمير حي ..


ياخواني المتزوجين ترى لو ماتكاتفنا مع بعضنا
ترى احنه آخر شي بناكل هوا اذا بنظل على هالحال .. آخر شي بتشوفون هالحريم يسوون فينا هالحركات اللي راح اعلمكم إياها وينقلب السحر على الساحر !!
آخر شي بتشوفون العصمة تصير بيدهم وأحنه المساكين بتصير حالتنا كسيفة وباد بخت نصير بعد .. فعشان جذي دلعو حريمكم عدل .. اهتمو فيهم عدل .. لاتقصرون بحقهم قدر الإمكان ..


اخوي ماتقولي لو ماتدلع زوجتك وتهتم فيها عدل وتصير المارد السحري حقها بتسوي مثل هالأمور حق منو ؟
يعني لو انته ماتدلعها وتحبها وتهتم فيها وتشيلها فوق راسك لأنها تاج راسك وتلبي لها كل حوايجها حسب المستطاع وبقدر المعقول .. فمنو يلبي لها مثل هالأمور ؟.!


ولد الجيران ؟


اخوي اهتم فيها .. والله ماعندك غيرها هذي ام عيالك لاتصير اخلاقك تعبانة معاها ..


انا تنبط جبدي اشوف ناس متزوجين وما يعاملون حريمهم عدل ومايشكرون ربهم عالنعمة اللي اهمه فيها واهي انه عندهم زوجة بحياتهم
هذا بدال لاتروح وتبوس راس زوجتك الحين لأنها منت عليك .. وتحننت عليك .. وتعطفت عليك بعد .. وأشفقت على حالتك لأنك كنت عزوبي
وتزوجتك ورضت فيك بالزوج الوحيد في حياتها وبأنها سترت نفسها وشعرها عن كل الناس وطلعت مفاتنها حقك انته وبس .. ماتعاملها عدل ولو بينك وبين نفسك ؟.!


بدال لاتصلي لك ركعتين شكر حق ربك .. انك تزوجت وتعرف قدر هالنعمة اللي انته فيها ماتعامل زوجتك عدل ليش ؟


ترى والله في ناس مايقدرون يتزوجون .. والأسباب مختلفة .. احمد ربك عالنعمة اللي انته فيها واهتم بزوجتك عدل ..
صير رومانسي معاها .. صير كلاسيكي وياها .. لاتصير حياتكم روتين ممل .. سوي بحياتك كله مغامرات وأكشن ..


كمثال


بين فترة وفترة بطل ألبوم العرس واقعد قعدة حلوة مع زوجتك وتذكر هاليوم اللي دخلت فيه العش الزوجي ..
قولها انك مشتاق حق هالايام الحلوة .. بس لاتوصل لها المعلومة غلط وتفهم انك بتتزوج مرة ثانية وحدة ثانية !!


جرب لو كنت مزعل زوجتك .. لو انته كنت غلطان بحقها .. ياخي روح اشترلها وردة حمرا اليوم وروح قبل جبينها
وقولها أنا آسف كنت مزعلج أو ماقدرتج بيوم من الايام سامحيني يا أم عيالي .. ولو ماقبلت اعتذارك ..


تعال عندي اصرفلك شيك بقيمة مؤخر صداقها !!


صدقني لو صرت بهالرومانسية .. وأكبر درجات الرومانسية .. بتكون محافظ على كرامتك ورجولتك .. فأول وتالي هذي زوجتك مو احد غريب ..
ترى الزوجة ماتحتاج بس شوفتك بالبيت وانك تقضي حاجات البيت من أكل وملابس وغيره .. تحتاج حبك وحنانك و رجولتك ..


شلون أوصل المعلومة لك الصراحة ما أدري ..بس أقولك نصيحة أتمنى تطبقها في حياتك ..


صير ريال بعين زوجتك مو بعين نفسك .. والحسناء ماحبت الوحش على عبط !


هالحسناء حبت الوحش عشان أخلاقه ونبله وإخلاصه .. هالحسناء ياحبيبي .. اهتم فيها وصير مثل الخدامة عشانها ..
بس هذا كله تحت بند لو كانت تستاهل طبعاً .. وإن شاء الله زوجتك تستاهل .. يعني كل واحد على حسب الظرف اللي عايشه ..


وانته عارف لو كنت ظالم لزوجتك من غيره .. فكر بينك وبين نفسك .. وإتخذ القرار اللي تشوفه مناسب ..


والوردة اللي قلتلك عنها تراها مو اكثر من نص دينار .. لاتستخسرها على زوجتك .. وإعتذر لها ..


صدقني اهم شي انك تكون ريال بعين زوجتك .. مثلاً يمكن انك تسوي امور تشوف انها تذل كبريائك وتجرح كرامتك ورجولتك .. مثل الاعتذار لها ..
بس هذا راح يكبرك بعينها وبتشوفك أحسن رجل بالدنيا كلها .. هذا اللي قصدته بأنك لازم تكون رجل بعينها مو بعين نفسك .. اتمنى وصلت الفكرة ..



بالمشاركات القادمة إن شاء الله راح نحاول ندخل بعقل الحريم ونفكر حسب منظورهم للأمور ..
يعني بتخيل نفسي بنت واشوف شلون احب زوجي يعاملني .. وفرض المحال ليس بمحال

... يتبع إن شاء الله تعالى ...

السلام عليكم
شلونكم اخواني الكرام اتمنى انكم تكونون بخير إن شاء الله

اول شي احب انصح الفتيات بنصيحة مهمة جداً .. وبعدها انصح الرجل بعدة نصائح .. وبالمشاركة القادمة إن شاء الله بحط لكم قصتي وتم كتابتها بقلم " متيمة ب علي " وانتو استفيدو من العبرة منها

وبتكون بالصفحة القادمة إن شاء الله حتى استغل مساحة الصفحة ..

أختي الفتاة
اتمنى انج تعتبرين زوجج شي مقدس في حياتج بكل معنى الكلمة .. تراج ماعندج غير هالزوج اللي يحفظج ويستر عليج ..

اختي لما اقولج شي مقدس عطي هالكلمة حقها بكل جوانبها .. اهتمي فيه مثل ماتهتمين لنفسج واكثر .. اهتمي فيه اكثر من دراستج وشغلج .. " لو كان يستاهل "
أول وتالي هذا الزوج اللي راح يشيلج فوق راسه .. واهو اللي راح يقدر تضحياتج عشانه .. لاتعتمدين على نفسج بهالزمن .. اعتمدي كله على زوجج ..
ترى الاعتماد على النفس اهو اللي مقوي راس الحريم هالزمن .. وهذا اكثر شي قام يسبب الطلاق بين الحريم .. الاعتماد على النفس .. بسبب الرفاهية ..

اختي اذا ماكنتي متزوجة
علمي نفسج من الحين تحافظين على نفسج .. علمي نفسج من الحين على الشغل الزين .. علمي نفسج من الحين على شغل البيت
ترى الزوج يحب المرأة الشقردية صاحبة المواهب المتعددة .. يحب المرأة اللي يقدر يعتمد عليها بغيابة ويثق فيها ثقة عمياء ..
اسعي اختي لهذا الهدف من الحين ولاتقولين انج صغيرة ! .. عرفي يا اختي انه الريال لو مات ابوه يقدر ينام الليل .. أما لو كان يوعان مابيقدر ينام كلش !
فـ تعلمي الطباخ وعرفي إنه أقرب طريق للرجل معدته !
وعرفي إنه الزواج مو كله أحلام وردية مثل مانشوف بالأفلام الرومانسية .. وما انصحكم بهالافلام التعيسة اللي تخرب الاخلاق و تنشر الفساد بالمجتمعات ..
الزواج أصعب من إنج تصيغين نفسج .. انتي راح تبنين بيت يا اختي .. والمسؤولية عليج اكثر واكبر من مسؤولية الرجل ..

بقولج قصة وحدة من صديقاتي كانت تطلب الطلاق من زوجها
هذي راحت لبيتهم وقالت لأبوها زوجي انا ما ابيه طلقني منه .. فالابو نصحها وقالها اتعوذي من ابليس ورجعي لبيتكم ومارضت ..

بعد فترة راح زوجها حاول يراضيها ويرجعها للبيت .. فإهي كانت منخشة ورا ابوها ماتبي ترجع بيتهم .. فالأبو قالها رجعي .. قالت ما ابي ..
فبعدها الابو مزق شوية من ملابسها .. فالبنت ركضت وراحت انخشت ورا زوجها على طوول بشكل لا إرادي !

فقالها أبوها ليش انخشيتي ورا زوجج وسترتي نفسج عني مع إني أبوج ؟.!

فـ البنت فهمت العبرة من أبوها .. وهي إنه الزوج هو الشخص الوحيد اللي يحفظ ويستر على زوجته ويحميها من هالدنيا ..

لاتصيرين مطلقة تراج بتتعبين صدقيني هذا اكبر عذاب .. صيري شاطرة بحياتج .. وخليج دايماً صفحة بيضا لزوجج وكتاب مفتوح ..
حاولي تتمسكين فيه عدل بشطارتج .. ومثل ماقلتلج .. اعتبريه شي مقدس بحياتج لاتعاندينه ولا تسوين عليه اختبارات عشان تشوفين شكثر يحبج !

أخوي أيها الرجل
بشكل عام انصحك نصيحة تنفع لكل الحريم .. وتنفع هالنصايح تكون الدرس الثالث

أخوي ترى الحرمة ماتحب تحن عليها وايد جنك عيوز ماكلين عشاها .. شخليت حق الحريم ؟
أخوي لو حبيت زوجتك تتغير أو تلبي لك طلب .. فاطلب الطلب منها مرة وحدة بس .. لاتكثر اكثر ..

تراك بهالطريقة بتنزل من قدرك وقوة شخصيتك بعيني .. فأنتبه يا زوجي العزيز !

يا رجل .. اذا زعلتك سامحني .. وادري من حقك اذا تضايقت مني تزعل مني .. بس لاتصرخ علي .. احس انك مو ريال جذي .. لاتطلع خشونتك علي تراني رقيقة المشاعر
احس انك ماتحبني لما تصرخ علي بويهي .. وتشوف الدمعة بعيني ولا يهمك ! .. انصحني بأسلوب جميل وهادئ وراح استحي منك بعدها وبلوم نفسي لو أخطأت بحقك ..

يا رجل .. إذا زعلتك زوجتك .. اطلع من البيت فترة .. اذا دقت عليك لاتجاوب على اتصالاتها .. بالكثير مرتين وبس ..
بهذه الطريقة كافي انك تأدبها وتوصل لها قصدك .. لاتمد ايدك عليها .. تراها بتكرهك لأنك تجرح كرامتها ..

يارجل .. المرأة تحبك وتحب تتملكك .. اذا أذتك وايد .. لاتهددها ترى التهديد لغة من لا حول لهم ولا قوة مثلنا احنه النساء ..
حاول بيوم تطلع من بيتكم .. ولما ترجع حط دبلة الزواج في جيبك ولا تلبسها .. ولما تشوف زوجتك انك مو لابسها راح تصير مينونة !
تقدر بهالطريقة تعاقبها لو ماسمعت كلامك .. وبنفس الوقت راح تأدبها .. وتخرعها وتدري انك مو هيّن والقوة في ايدك والكرة بملعبك ..

لاتصرخ علي يا زوجي العزيز أو تفكر تطقني بيوم من الأيام أو تشتمني .. تراك بتندم فحاول تسيطر على غضبك .. خلني أحس إنك قوي شخصية ..

يتبع إن شاء الله تعالى

يتبع بالصفحة القادمة إن شاء الله تعالى ..

نعتذر نود أن نستغل مساحة الصفحة ..

يتبع بالصفحة القادمة إن شاء الله تعالى