إحسين بَس إسمَه...قصيدة/قصيدة ل:فاديا الخفاجي/رسالة لكل شاعر

[خادمة الائمه]

[align=center]إحسين بَس إسمَه...قصيدة
شعر:فاديا الخفاجي
حاير إشيِكتب قصيدة*اُووَرقِتَه اُوأقلامَه بيدَه
كاعِد إيفَكِّر..يِحَظـِّي*يطلب إب فِكرَة جديدة!!!
كِتلَه خايب عَشرَة عاشور* إحيي طَف لِنْحَز وَريدَه
كَللي كلما أكتب أرثي*هسه أريد أسطر جديدة
كِتلَه خايب ماتِحِس *هَل طَف تُراث إحنَه نِريدَه!!!!
وَك حُسين إب يوم طفَّه* خَطَّط إل اُمـَّه جِديدَة
تـِخْتِلـِفْ عَنْ ذيجْ لُمَّه إللي* يَزيد أفـْرَحْهَه ...عيدَه
تِطـْبـِل اُوراس إلحُسين *إبْ طاسْ... يُضرُب ثـَغرَة بـيدَه
هَل نَجـِس حَـيَّتْ اُمـَيَّه* مِنْ اُمـَر ينحـَزْ وَريدَه
كِلـهَه أفتـَتْ ...هَل حـُسين *إنْ مات هَلْ شَغلَة مُفيدَه
طبعَن إن كان إللي أفتى *إشْرَيحْ... مَصـْلَحـْتـَه التـِريدَه
اُوصار أقضَى إمنْ إل قُضاتْ * إب يوم حَز لـَحْمَد حَفيدَه
وِل عـِيَال إللي إنـْسـِبَوا * وَك يـِلـْهِموك أجمَل قصيدة
إحسين... كُلْ تاريخْ دِينَه *إبْ دِمَه نَحرَه... إيدَونـَه بيدَه
والضِّلوع اللي تِكَسـْرَت *تحتْ إل إخيول العـَتيدة
جانـَتْ الاسطر* للأوراق الحزينة... اللي تـِبيدَه
نـِشعُر اونـِكتـِبْ قـَصايد...نـِرثي بي وِلْ كـِطعَوا ايدَه
هاذه وَك لـِحْسَين نـَفسَه *لـِفـْتـِدوه حـَـتَّه عَبيدة
اُوماتِسَطِّرلَه مَشاعر!!!* ماتِسَمـِّعنـَه قَصيدة!!!
راح لـِحْسَين إل إلاهَه* اُوعاف لـُوصِيَّه إلحَفيدَة
يثأر إل أيـَّام طـَفـَّه *اويجعـَل إلدِّنيـَة جِديدَة
تـِخْلـَه مِن كِل ناصـِبي *ايساوي اللي سايـِدْ وَي عَبيدة
لاتـَمايـُز طَبَقي !!!* اومـَتـْشوف ..مَنْ حـَيْجَدِّي بيدَه
كلهه تِمـْلـَه إجيوبهـَه اوتِسعَد *...يـِصيـِر إلعيد عيدَه
كـِلنـَه مَظلومين * هوَّه إيـْرِدْ حُقـُوق إلناس بيدَه
نـُصرَه وَكْ بَسْطـُر قلائـِل *جـَن تـِمـِد إيديك ليدَه
كـِلهه بَيعـَه ..اي..وَلاكن* يـُبقـَه ينطـُر مـَن يـِفيدَه
احرص أنْ مـَتبيع دينـَك* ترتجي الدنية الشَّريدَه
احرص أن تـِشْري إلنهايـَة * اُوخـَلِّي آخِرْتـَكْ سـَعيدَة
لا تِكـولْ إنَّ الغـَزَل *حيطـَلِّع إلنغمة إلجديدة
الله كَلْ لـِحْسين* بالفَجْر إنـْذِكَر ذَبْحَتْ وَريدَه
والشَّفِع.. وِل ْوِتـِرْ * إتـْسـَمـَّنْ ليالي عـَشرَة أكيدة
كـَللي مَتكتبين إنتي ؟ * كِتـْلـَه فـَد كِلمَة تـِفيدَه
خويَة ...كـُل شِعري مَراثي*اوبَعدي أشعُر مادَفيدَه(انني لا فائدة مني )
هوَّه راد إنعيد يومَه*وِلْ طـِلَعْ مِنِّي..قـَصيدة
وإلحِزِن...وَحدَه إيـتِجَدَّد* وإلدِّموع إتهـِلْ تـِريدَه
فكِّر إشوَيَّه تِخِدْمَه!!!*اوطـَلِّع إل جُملـَه إلمُفيدَة
أرِّخ إلتاريخ كِلَّه*وإصعَق إلطالب يـِبيدَه
خُويَه عازي إحسين* عَطشان اُوغريب ...اُوذاك عيدَه!!
هَلْ نـَواصب تمحِي طَفَّه* إمْن إلْ ذِكـِرْ...حتَّه الجَّريدَة
لاخَبـَر يحجي إعـْلـَه طَفَّه*اُوبَجِّلـَوا شِمرَه او يَزيدَه
سوَّوا المَظلوم ظالم *وإنمـِحَه إبْ ضـَربَه شـَديدة!!!
اُوعادى ايمام إلزَّمان *إلْ ينبُض إلخـَمرَه ابْ وَريدَه
مادَرَيتْ إيمام *إسلام الغـَجَر ...هُوَّه مُبيدَه!!!!(مُبيد الحسين)
سُنـَّتْ إل إيمام *ابن إلعاهِرَة.. إهنَيدة الطـَّريدَة
إنـَّه يشرَبْ بِل خَمُر* ليل اُوصُبُح... هَم دَفَّه بيدَه
يـِكعِد إيدِكْ للصُبُح* والراقِصات إبْ قـَصرَه ليدَه(كثيرات)
ينمِلِي الكاشي إب خُطاهِن *وِلْ يغَنـِّيلـَه... عَضيدَه
يكعِدْ إيهـِز وَيـَّه رَبـْعَه* لادِيانـَه... اُولاعـَقيدَة
ايكول "لـِعْبـَتْ هاشِم* إبْ هاذَه المـُلـُكْ...مُلْكْ اُونـِريدَه"
اُويهـْزِجْ ايصِيحْ إبْ سُكـُر "ماكو وَحي ...شـَغـْلـَه بـِعِيدَة
اُولاخَبـَر جانـَه" ..اونِكَر رَبَّه *اُونِكـَرْ هُو مِنْ عَبيدَه
هاذَه دِينـَه ..بَس كراسي*اوكوسْ خـَمرَة إيهـِزهـَه بيدَه
هُوَّه هاذ إللي صُبَح * ليمام... للأُمَّة العـَتيدَة!!!
وأحمد إيضَحِّي إبْ عتِرتَه* اونـَفسَه للأُمـَّه السَّديدَة
تالي هَلْ تـَسديد *صار إسهام تـِنـْحَرلـَه حـَفيدَه!!!
اوتـِزرُف إكلوب الحـَبايب *تمطـُر إسيوف.. اورِعـِيدَه
هـُوَّه صوت إسيوف* كـُلْ إمخالـِفـِين إل شال إيده(مخالفي علي ع)
إبيوم خُم.. اُوبـِلْ غـَدير* إيصيح بـِسْمـَه ...اوصار عـِيدَه
مـِنْ إجاه جبريل* كال الله ..كمَّل دينه ...بيدَه(يكمل بعلي ع)
سَيفـَه ينطـَحْ بالسَّحاب* ايزيحْ كـُل غُمَّه ..اووَليدَه
إيصير كـَبشْ إسلام لـُمَّة * وِلْ نَحِر قُصْـتَه أكيدة!!!
صاح إبِن وَقـَّاص لـَغـْـبَر* " ثوروا...ثار إحنـَه نـِريدَه
إلوالـِدَك..يَلْ مات * بسيوفـَه العـَلي الكرّار...أريدَه
إليوم إبنَه ايوَفِّي دَينـَه "* اوكامَتْ إلْ اُمَّة تـِبيدَه
جـَنهَه قِطعان إل ذِيابـَه* اُوصادَتْ إلصَيدَه الجِديدَة
كِلهـَه تِلهَث عَل نـُقـُود*اوتطلب إمن إلوالي ..جـِيدَه(تطلب نحر الحسين ع)
سِلبَتْ إلْ هِدْمَة إمْنِ إلأجْساد* إلطَهورَه اوكـَصَّوا إيدَه
ضُربَوا إجْبـينَه ...اودِماه* مِنعَتْ نـَظـَرْ عَينَه السَّديدَة
رادْ ...فـَدْ... نـَظرَتْ وَداع* إتواسي بيهَه العَين... جيدَه
إلراح يتوَذَّر وِذَرْ * تتطـَشَّر اُو يُقطَع وريدَه
يضرُب إشمير إلنَحَر * عشره اوذَبِحتين ...اويريدَه
إنـّوب يُرفَع عَلْ عـَمود *إيهادي بي رَبـَّه... يَزيدَه
كوم وإكتِبْ يا خَويـيِّ...اُولا تـِخَلـِّيهَه قَصيدة
خَلـِّي أسطُر هَلْ كـِتابـَه *مـَجلِسْ إيعَزِّي حَفيدَه(المهدي عج)
هيجي تـِبْخَل عَل حُسَين * إبْ كَم سَطِر تِطلـَع قـَصيدة!!!!
خُويـَه حاول ...إكتِبْ.. إكتـِبْ...والله ليساعِد عَبيدَه
وإنتَه مِنْ شيعَتْ زمان * إبنَه إليناطـِر مَن يريدَه
إكتِبْ إسمـَك في كـِتابَه * اُوكَم قَصـِر ..شغلة جديدة
إتحَصِّل إب اُخراك *وَيـَّه كـُل سَطـِر... مِنْ كـُل قـَصيدَة
نَزِّل إمْن إلعَين دَمعَه*سَمـِّعْ إذني شي أريدَه
وِنـْتـَه هيج إتنول حُبْ * إحسين وِل شـَفاعـَه بيدَه
لو تِحِطْ سَطرين تِكفي*إحسين بَس إسمَه...قصيدة[/align]

[أبو رباب]

اللهم صل على محمد وآل محمد وعجل فرجهم وفرجنا بهم يا كريم
موضوع رائع
وطرح مميز

بارك الله فيك